Home Opinion Paldas a parangal kang melapupuring Amado Higante

Paldas a parangal kang melapupuring Amado Higante

207
0
SHARE

METUNG ne naman ken karing matibe pun
Ning AGTACA’t BUKLUD, kadua rang pekapun
Ding watas ning lipi, ing payapang memun
King karinan ning lua, busal ning pagmalun;

At piping siguk ding kayang kapamilya,
Kapatad king Sabing mana at Kultura,
Kabalen at sablang kayabe poeta,
A e ra atanggap ing mako ne pala;

I Amado Higante, a kabilang karing
Peka-aktibu at metung mu naman pin
kareting poeta king pamanang Sabing
Ing Dios yang minie at sukat pagmairing.

I Tatang Doy, simple yang tau at malam
A ugali ampo pang sobra kababan;
E mapad keng bage a e na nabangnan
Ning kaparang tau, lalu pa’t kasiran.

Nung ing katuliran ning metung a tau,
(Partikular ding malukang ortelanu)
Madadakurak king dapat a e ustu,
Yan pakilaban na karing propetaryu.

At e na mu naman pitakutan niti
Ing masukul king uli namu ning iti,
Piglualu ne laban king gubyernu pati
Ing anak-pawas a duhagi parati.

At bilang Sugo keng pang-internasyunal
A kapulungan ding asosasyung keyang
Rirepresenta ken karing miayaliwang
Bansa aktibu ya at mirinan galal .

Inia i Tatang Doy, bukud king ‘AGTACA’
At ‘BUKLUD’ antimong Kaduang Pamuntuk da,
Gimpanan nang mayap ing katungkulan na,
King bie niti bilang laureadung poeta.

At agiang maralas, ya pang migagastus
Karing sasane nang king Sabing memukud
Mabiasang sumulat, gumale at lauk
Ligligan poesia, iti e patugut.

(At waman ing tutu, king bage antiti
Ikaming poeta king mana ta’ng Sabi,
Ala keng material a bage akua mi,
Ditman malaut keng paimburis kaniti)

Nun’e ing panyulung king pamipalabung
King Amanung Sisuan kekeng ibalayun
Kambe ning pamanang likuan nang Tatang Doy
Karing bayung Suli, saka bayung Sulul.

Antimurin naman karing aliwa pa
A tune malugud king Salitang mana,
Ban bukas makadua, king azul a banua
Miuman mamayagpag ya ing Sabing mana.

Poeta Laureadu Amado Higante,
Yabut mi keka ing malugud ming puge
Bilang talasulat ampon talagale
Ning Sabing kakambal ning marangal mung bie.

A e mimusingan king danggut mung dila
King uli ning ika yan e me selaula,
King e karampatan a kekang selita
Arapan ding taung keka maniwala!

LEAVE A REPLY

Please enter your comment!
Please enter your name here