PANDI, Bulacan – Nagmistulang kampanya ang pagbisita ni Vice President Jejomar Binay sa Bulacan. Dinepensa ni Binay ang kanyang sarili sa harapan ng kanyang mga taga-suporta sa Pandi Sports Complex na isa sa sortie nya sa Bulacan nitong Huwebes. Sinabi ni Binay na pawang walang basehan sa mga akusasyon laban sa kaniya at pawang bahagi lamang ng pamumulitika. Aniya, sa gitna ng paninira sa kaniya ay umiikot siya at derecho na nakikipag- usap sa taumbayan. Talo daw ng paninira ang pagpapaliwanag niya sa tao kaya siya nag-iikot. Gayunpaman aniya, wala siyang pinagsisisihan sa paghahangad na maging pangulo ng Pilipinas sa 2016. Pinangarap daw niya ito at pinaghandaan na niya ito. Binigyang diin ni Binay na kung siya ay mananalo na pangulo ng bansa ay ang magiging batayan niya ay ang Makati experience. “Ganito kami sa Makati…” pinagmalaki ni Binay sa kanyang mga taga-suporta ang kanyang mga naging programa sa Makati. Dapat daw ay may kakayahan at may karanasan ang magiging susunod na pangulo ng Pilipinas. Matapos ang talumpati ni Binay ay nagpamigay ito ng mga souveniers sa kanyang mga taga-suporta. Matapos noon ay nagkaroon ng pagpapalitrato ang kanyang mga taga-suporta sa kaniya.