Salamat, at DPWH na rin
Itong sa ngayon ay biglang nagpatigil
Sa pag-masaker sa kaunting nalalabing
Mga punongkahoy na dapat sagipin;
Kaya lang, ang bagay na nakakalungkot
Ay kung bakit kailan nga po nila halos
Maitumba lahat at maubos-ubos,
Saka nila naisipang ipag-utos;
Na itigil muna (until further notice?)
Ang pagputol bunsod nitong umiinit
Na kilos protesta ng governor’s office
At ng ating mga enviromentalists;
At iba’t-iba pang concern citizens d’yan
Na may malasakit sa kapaligiran,
Gaya ng STC ni Ching Pangilinan
At ni Cecile Yumul, na nag-suggest po riyan;
Na dapat anila nga po’y magkaroon
Muna ng ika nga’y public consultation,
Bago gumawa ng ano pa mang aksyon
Ang nasabing opis bago n’yan ituloy
Ang pag-masaker sa mga nalalabing
Punong akasya r’yan at iba pa manding
Biyaya ng Inang Kalikasan natin
Na namimiligro ring mawala sa ‘tin!
At ang hindi natin lubos na malirip
Ay kung papaanong kahit walang permit
Na inisyu itong City Mayor’s Office
Ng San Fernando ay sumigi ang putris?
Kung saan posibleng sa ganang sariling
Pananaw po natin, sila’y maaaring
Makasuhan r’yan ng illegal dismantling
Of public properties but without securing
The required permit for any activity
That are duly mandated by the said city;
Kahit sabihin pang gobyerno rin pati
Ang nagsagawa ng trabahong nasabi!
Ang city government po ng San Fernando,
Kumbaga ay mayrung sariling gobyerno;
Kaya di marapat basta na lang ito
Pakialaman po riyan nitong kahit sino!
(Pagkat gaya nga po ng pangyayaring yan
Ay si Mayor Oca ang inakala riyan
Na nagpaputol n’yan, gayong walang alam,
Kundi itong nagsabi sa DENR)
At ang Kapitolyo’y ganoon di naman,
Si Gob Panlilio ay di dapat hakbangan;
Ano’t kahit pasintabi lang yata riyan
Si Tolentino ay di tumimbre man lang?
At ang siste hinggil sa ilang Senador
At iba pang ika nga’y ‘national figure’,
Aba’y kung kailan at wala ng panahon
At halos ubos na saka pa hahabol?
Upang makiisa sa ating krusada
Na ipaglaban ang buhay na natira?
(Kung kailan ang kabayo ay patay na,
Saka n’yo dadalhan ng damo kumbaga?).
Ano’t-ano pa man, sa puntong naturan
Ay baka sakaling pati Malakanyang,
Manghimasok na rin kung kinakailangang
Ang nakatataas ang dapat makialam!