Nunte ing kakung bayani?

    436
    0
    SHARE

    Balus ing kekeng panlakad, ikeng adwa ning anak ku
    inyang bigla keng mitulid king tindahan na ning barriu;
    at king pangatulid mingy an, memandal ya ing bungsu ku,
    “Ima, putu..putu” ngana, “Sali kata, sali mu ku…
    At agia mang alang-ala, “pota, potang bagia” ngaku
    “bisa ku pang mandam pera king kasamak nang tata mu”
    at ing anak menusig ya, tegal na kung pasibayu,
    at marapal keng tinaglus king bale ning propetaryu.

    Dapot kabud miras kami king bale na ning paobra,
    sinabi ning katiwala king matudtud ya ing matwa;
    inya agiang dapal kami, mepilit keng menenaya
    uli ra pin ding sarya mi at kaylangan ming alaga;
    At emu metung a oras ing makainip ming pibata,
    bayu ya ing migising ing don at linwal ketang silid na;
    inya kabud apalsut ke, seganan keng panalala
    at magalang kung seingsing ing pinta ming ita kaya.

    Dapot kabud dindam ning Don king kwalta ing kakung sarya,
    ngana, “e mu panamdaman, era na ka adinan pa,
    uling ing kekong listahan milalu ne king kakaba,
    saka ketang tauling pupul e ko’ mildug mang bitasa;
    Ing tabtab yu at abonu ampon gamit pang aliwa,
    e yu balung palto gastus king mayumu yung akakwa,
    at kabang ing kabiayan yu, ngayu, masakit a bina
    balita ku ing abe mu susugal yang alang patna”.

    At king sinabi ning matwa bista’t anti kung mepipi,
    pinilit kung mengamanu king karungut kung mabandi:
    “Tatang” ngaku, “balu ku ngan pu ing sablang bage iti
    at aku man mimimwa ku king daraptan nang tata mi;
    Dapot… ngeni namu sana, ngeni na ku makisabi
    angga na keng mupul tamu keng daratang a Nobiembri,
    saka kaybat na pu nita, pakikwanan ming parati
    ing pamamawas kareting kwaltang milista kekami.

    Iting matwa, lalam na ning pamakisabi kung mayap
    melikid yang piling-piling at king awang ya minarap;
    sinindyan ne ing pipa na, miglabul yang alang patad,
    diklut ne ing piryodiko saka ne pibuklat-buklat;
    At animong kasamak na, ita balu ku nang malwat
    tanda na ning bigu kami king nasa mi at pigagap;
    makanyan man penaya ke king tauli nang ipakibat
    dapot melambat keng bina, e ne mibayu pamalak.

    Tinipa keng alang imik ning abe kung tai-tairan
    malambut la ring kakung tud at ala kung panimanman;
    ding taung asaganan mi king tukuran na ning eran,
    agia mang kesabi ku la e ko’ balu nung ninu ngan;
    At king lakad ming pauli, pasibayu keng dinalan
    king tindahan na ning barriung maki-putu a kapangan;
    dapot ing anak ku rugu e na na’ ku lingasngasan
    bista’t lima ya pang banwa lubus na’nang aintindyan.

    At kanita mras kami king lugal ming maka-bana,
    linapit ku at linukluk king asung ming makaragsa;
    at kabang atyu ku karin, bista’t mistula kung lula,
    apansin ke ing mula ming mekalingwan na’t melanta;
    Bukud king biabas a dutdut lele ning bakud ming sira,
    ala na keng makatanam agiang ka-pun mung apalya;
    ala keng babi o manuk a apate mi mu man sa’,
    ala keng gule alutu, alang ebun a mayakwa.

    At kanita kya mu naman ikit lele na ning dalan
    y tata mi ring anak ku’t ding kabarriu ming mapilan
    ketang lilung ning akasya kukulyo lang agnan-agnan
    uling bignus do’ ring adwa karing manuk dang apisan;
    At kanita ku aisip ing masalang kalaraman
    a sasabyan da ring watas king kawal na ning asikan,
    iti palang ortelano a karelang babayanian
    pabaya ya’t kulang lingap karing dapat nang pakanan.

    Uling ngakung misip-isip, nung king napun nakadwa na
    masipag yang menanaman king mula mi y tata ra,
    kase , ngening sang’ panaun a melipit keng talaga
    ating gule ming alutu, ating prutas ming atinda?
    Dapot ing panaligan mi matudtud yang ala una,
    migising yang alas kuatru, magpasyal ya’t maki-dama;
    iti wari ing bayaning pupugayan ding poeta?
    ding anak nang mangalati king danup la mibabata.

    At ustung aldo Dominggo, agad na kung pakisabyan
    andaman no’ ring kwalta ku nung atin pang makatagan;
    miblas ya’t muli king balen, taglus-taglus king sabungan,
    ni e na aganaka mang paindalan ya king pisamban;
    Magbalik yang silim-silim, alang nanu mang daralan,
    ding anak nang sasagana anti nong’ e darandaman;
    at potang mapun na kami, ba’t e ya mangalimgiman,
    akakit no’ ring anak nang e kakabsi king pamangan.

    Itang lulub a ligalig king pamisip kung mangaplas
    pipilitan kung alilan king makatulang pamalak;
    dapot inyang talakad ku, ba’t apansin ko’ ring anak,
    ding anak kung mangalati mamangan lang tulud biabas;
    At king ikit kung makanyan, mipakde ku’t mipayatras,
    linukluk na ku gabun, menigalgal ku’t mipakyak;
    at ketang oras a itang tatangis ku king pagsalbat,
    ing bayaning ortelano king dalan ya sasagakgak!!!

    Neng Cecilia E. Manalang
    Mabalacat, Pampanga

    LEAVE A REPLY

    Please enter your comment!
    Please enter your name here