Home Opinion Ninung dapat tamungibotu mu kareni?

Ninung dapat tamung
ibotu mu kareni?

610
0
SHARE

KABALEN, nung bisa kang makapilukluk
Mayor, a masipag, malinis, alang biuk
ning nanu mang adle a pamangurakot,
e ka bisu-bisung mamalal na kabud.

Pakibaluan me pa nung kenu ya mapad
makisingkilan at makiabe maralas,
ing ‘choice’ mu, nung nanu pamirapat-dapat
o king e masanting malaguang ayasag.

Nung iti tinagal yamung pasibayu,
e binang masulit kilalanan ustu,
uli na ning agyang ken mung sarili mu
yan posibling sanak m’ne panga-tau.

E ra kalupa ring nung wari king tagak
a likas maputi bulbul, meging uwak
ne kule uli ning kapul ne keng burak
na ning pulitikang asna king karinat.

At nung arapat da ing e na la tipa
o kuldas king ngeni a luluklukan da,
gawan da, uli ning keng manakitan la;
agyang e ro’ yatyat den ding kamau ra.

Atin mu namang ken matapat susuyu
at biasang tupad king bignus nang pangaku,
oyan mayayakit, sasapnuan da niamu,
pero e na’lakuan ing serbisyung tutu.

Atin mu naman ken a mitalabu na,
pero ing sarili niti babangun da,
banting nu’man anti bayat ing kasu na
akua rang alarin keng pamye nang pera.

Keka, a ngeni pa sumubuk itaya
ring pipawasan mu at bie mapayapa,
ing tigtig nung nanu, ing iterak kusa
ban e ka malakuan king saglulung banka.

Uling kasing agyang keng mung singkaragul
pamie rang kusa ken dening kalaban mung
matapang a pera, nung e mu akaul
igitan matras na ka kabang maranun.

Paniambut na ning ken ding pera na niti
e la makataling pisi o alambri,
kumpara pin kening e pa sane iti
king ngeni tigtigan a magastus dili.

At nu’ mamie ya’man pabarya-barya mu
a tidua, at anggang titlung dalan rugu,
nanung panama n’yan nung ya e na agyu
ing maki-sindagul ya karening atlu?

Nung king bage, iti, e ta’ya asisyan
uling ding pera na, penintunan no’ nyan
king asna kalinis a kaparalanan;
subali king e na buring lumon da’yan?

A inusu ra ken ding manganak kualta
king negosyu reti a miayaliwa na,
puera king maluat na lang ken makasoga
king e ordinaryung dikut a Bermuda.

At nung karing kakung bignus a salita
atin kung apatu ken o asagasa,
adwan kung ila nang balang manupaya,
uling e masanting ing pabigla-bigla.

Pablasang ing kaku, makapatungul ya
karing maburi keng e para karela,
at e para karing banal a konsensya,
a pakaingatan de ing kaladua ra!

LEAVE A REPLY

Please enter your comment!
Please enter your name here