MALUAT neng malsintang lihim ining Pisuk
kang Sion, a bunsu nang anak matuang Enuk,
A ing opisyu na, mamagtindang langguk
miayaliwang gule, aslam ampon baguk.
Ining Pisuk agyang ala’ng balung obra
nune kubrador mung jueting king baryu ra,
Aisip na niti ing pamakiasawa
at ini ping Sion ing bukud apili na.
Malagua’t salita, misan a tikatik
ing patak ning uran, aisip nang menik
Dinalo misan pa, ban iting matalik
nang sinta, ipasyag king pang-pitung balik.
Kabang mi-arap la ketang lamesita
lele na ning awang, bale ning dalaga,
E mipaindatun i Pisuk king lukluk na
kabang i Sion pane itang sisingut ya.
“Sion, marahil balu mu na,” nganang Pisuk
“ing sangkan nung bakit ing tinda mung baguk
Pane kung papakyon, pati na ing langguk
ampon aliwa pang malapit nang muluk.”
Timan-timan ya mu ining Consalacion
kaba ping aplit yang didiga ing metung;
Angga king bili ren a maratun-datun
Balamu ing kabud na ating memakbung!
Ining palang Pisuk minatut ya rugu,
Nan’ nemang aguantan mesikan pang lalu;
Inya keng dine na ta’nya miparuku
at keta anti yang mipakat king bangku.
Keng pamamigil nang mipakayli ning Sion,
ban i Pisuk e ya dumine maragul,
Ay rugo… linobo itang kayang sipun
a linwal mingatba ring busbus nang arung!
King milyaring iti, ninu karing adwa
ing mas makarine king milyaring bigla?
Ay tabalu, pero ing mas makatula,
ing kabud na ating tugak a sinapa!
(Pero ngeni uling ing pamamanikan
E na usu, at anti nang mekalinguan,
Ing pamipaglolo da ring kayanakan
Mararapat namu keraklan keng dalan.
Inya naman nanung madalas malyari,
Partikular karing anak tang’ babai?
Masdan ta’na itang karelang pengari
Potang kayabe neng muli ing lalaki:
At ngana: “Tang, Ima keti na ke pamu
Tuknang, kabang ining asawa ku rugu,
Maytun yang obra na”… e ka mikaluku
At keng mua mu maybung kang matdas a salu?
Lalu pa’t ala kang ken kamala-male
Nung kenu pamilya ing alang marine
Ayasawa nyan a keng pibale-bale
Yu mismu tuknang at maging katubalgu?!)
