E KU kenu’t- kenu, ala kung kakampyan
Kari vice mayor Wong at Sangguniang Bayan
Sec Carino inggil king kasalukuyan
A isyung kareting adwa mamilatan;
Nung nu’ i Carino linto ing balamu
Anak ya ing keyang kadibati mismu
Kilub ning ‘session hall,’ uling ding amanu
A pisyag na e la disenting terminu.
Makatud wari ing ya e bitasa mang
Pepa-‘pu’ o kaya ngara pin salitang
‘kekayu,’ antimong king salitang menan,
Yan mangabaldugan, lusuk kagalangan.
At e anti rening magaspang lang bina
Ding king labi niti linwal a salita,
Inya e malaut asabi ring malda
King i George ala kanung modu yata?
Ing pamibadbaran dang matulid deti,
Pasari namu ning sususpendian de’yti
Lalam nang upaya ning Bise Alkalde
Hinggil king ‘illegal’ a pengawa niti,
A nu’ lalto ya ing awtor ding keraklan
A resolusyon a gewa rang pikwaltan,
Ding mengasuspending ngara ken konsehal,
Pati na ing Mayor (a alang kabalwan?)
E ke kakampyan ing kekatang ‘Vice Mayor’
Inggil king pepalwal na niting ‘Suspension
Order’ kang Carino, yan asagka ke nung
Ing utus labag ya karing ‘existing laws;’.
Pero ngara pin ken ding mekapanalbe
Keng ‘facebook, messenger’ o nanu mang aske
Ning pamamalita, pati ring kayabe
Keng ‘Tri-Media,’e ya lunto makarine?
Nya mas masanting ing magkalag ne iti
King puesto na bilang SB Secretary,
Kesa king tungkulan niti manatili
Yang pikaylian ampo pane pamagsisti.
At antining ken king Sangguniang Bayan
E na ne malyaring akayabe miuman
Ing Vice Mayor uling mesira na bilang
Itang masanting a karelang ugnayan;
At nu’ lunto nya mung mengari king putu,
A’yala nang dit’mang unabis mayumu,
At/o matabang na datang kang Wong mismu
Ing akayabe ne pa king munisipyu;
Ayamyam na pa nyan ing ken king ‘session hall’
Makalukluk kabang ila ning ‘vice mayor’
Mapinkanlaut na ing sadyang relasyon
Dang asna kasanting antimo ing napon?
Nung nu’ ining ngeni kabangga nang mortal
A sadyang kautus at kakaluguran,
Ing kwenta dapat na niting pakyabayan,
Atin ya pang sikan-lub ban magdatun kyan?
At saka e na’a wari man aisip
Ning taung yan nung e i Wong – e mipanik
Antimong SB Sec, nya kelan balikid
Utang a lub bandang tawli ing meyakit?
