Napun king bayat ning papil mung gimpanan
Ing bie mu teya mung alang picacunuan;
Nanu’t ing panganib e mu man picabiang?
O qng balu mu nang imbut da cang siluan,
Yatad at pagnasan paten ding calaban.
Atin pa mo cayang mibait anti’ca,
Qng uli ning balen itaya na’ing bie na?
Upaya’t sicanan na ning dictaduria,
Ica ing matatag a tinutul queta;
Nung inia uli mu, miuman miticdo ya
O sinubling mebie…mete democrasia!
Nung nu’ king uli ning sobrang kasakiman,
Ing personal da nang interes deti’nan.
Nung wari sa’ caring batucan keng sugal
O ecspertu caras queng capanecasan,
Yang cayalimbawa da ring magdidiral.
At nu’ abilang mo pin caring taliri
Qng bage mesabi ding e masasali
Uli ning catutuan a mas deting buri
Ing misasayaran lang taba qng labi,
Nung inia e ra ne buri mang ibili
O ibulus karing gamat da ing susi!
Malagad lang bina qng yatung carinan
Ding anti’ cang Ninoy a e ra picabiang
Arapan ing nanu mang peligrung datang
Acua niang asalba at abawing miuman
Ing democraticung uring capamalan,
Qng gamat ding ganid at alang picabsian.
Oyan, qng uli ning masapsap nang nasa
Ban kamtan ning Balen ing pangatimawa,
Carin qng tarmac ning paliparang bansa,
Ing mapuring Ninoy berilan deng cusa
Ding galame na ning saquim qng upaya;
A nu’ angga ngeni malabug pa’ing sabla
Nung ninu ring tune atyu cagulutan
O minutus mu man cang Rolando Galman
At caring sundalus minantabe bilang
Cang Ninoy, niang ume ne sanang culdas yan;
Nung nu’ patipa ya pamu quetang eran,
Beril da ne iti dane cagulutan!
Ninoy, qng uli ning daya mung misaluac
Iniang mipase ca’t mibulang qng Tarmac,
Meging dalan iti ban ing mal mung labuad
Acua meng abawi king bacal a gamat,
Ding qng Palasio ala nang balac culdas,
Niang ing EDSA Power ya ing micalabcab!
Inia bigu man ing banal nang paninap,
Ing ya sanang mugit king timun ning labuad
Banting mitimawa qng aldo ning bucas;
Cang Cory, meyatbus ing cayang pigagap
Mitimawa bili iting Pilipinas,
A pigduglan niting king gapus makalag.
Inia mangaintulid mung iduang ing sucat
At carampatan a pamipasalamat,
(Cang Ninoy, cang Cory, a lubus dang sekab
Pati sarili rang canawan a maslag);
Cambe na ning panalalang alang cupas…
Qng tune bayani a mibual qng Tarmac!
