KENG PANGABALANGKAS na antimong siyudad
Ning kanita balen na ning Mabalacat,
Ing punbalen niting migit mekatapat
Nang mipuk king puestu ya muring mapalad
A mig- ‘city mayor’ na niting sadia na
A meto’ maunlad nang pueblo kanita,
Lalu pang milablab migit king minuna
Ing ekonomya ken uli ning mayor da
A kabalitan keng sipag manungkulan
Inya ing panyulung malaguang akamtan,
At keta ing sabla a makasanting ngan
Para karing sabla mabilis miduduang.
Kambe ring pawa mu namang mangasipag
A opisyales ning malinang a siyudad,
Keng pamangasiwang malinis at tapat
Ampon ating tune parasan a mayap
King ikanono ra at ikasaplala
Ding keyang memalen – pati na ring sabla
A keti mindaywan uli ning balita,
King ing magnegosyo ken e makadala
Pablasang ing pamangotong a ausan da
Ken king Mabalacat e pin usu ngara,
Kasi alang ‘corrupt’ ampon mapamyasa
Karing manungkulan ampon galame ra.
Lalam nang masampat a pamangasiwa
Ning ‘most longest serving mayor’ keting bansa,
Ing anti kaniti kasaman nang bina
Inya ing makanyan ken bitasang ala.
Malingap ya’y Boking karing sasakupan
Bilang ‘city mayor’ a sukat aligan
Nung inyasa’t karas keng kaligaligan
At kapaldanan da ayasahan de yan.
Metung a malino piyakitan iti
King y Mayor Boking Morales pin ngeni
E ya mu kabud ken mangakung parati,
Nu’ne patunayan na keng pamagsilbi
At e yamu naman diritsu keng plaza
Neng alalan banting ya ing ibotu ra,
Nu’ne katapatan arapan ning Masa
Ing alang nanu mang kanlap papakit na.
Uling nung ya kalupa ria mu marahil
Ding aliwa, nu’na dasan ing antiting
Kabilyan a nung nu’ anam neng ukdu ping
Mipuk king tungkulan ing anti kang Boking?
A nu’ mabilug a bansa ya pa kabud
Ing pekamakabang migserbisyung lubus
Migit labing walung banuang alang patlud
Antimong alkalde bayu meging lungsod?
Iting Mabalacat a ngeni pakibas
Ding expert bilang next to Makati bukas
Karas keng komersyu’t aliwa pang sangkap
Na ning progresibo’t maunlad a siyudad
A e binang lumuat king uli nang Boking
Iting panagaula datang at datang pin
Ban ing Mabalacat lalu yang miningning
Keti dane Norte at kasiping-siping
Pablasang insa’mang balayan o siyudad
A binang masese king dalise lingap,
Alang pasubali king iti e munlad
Lalam nang upaya ning lider a mayap!
