Bayu ke isundu ining kawatasan
A ngeni buri kung idake keko’ngan,
Muna, e yu sana ipangabaldugan
Ing insultu iti kenu mang mituran.
Uling iting bage pagnasan isulat
e ya mu kabud na pikatsa at sukat,
nu’ne king tune bie madalas marapat
ing makanyan king e ta’ ganap pamingat.
KARING makibale a maki-kasaup
Ausan dang “katulong” keng sabing Tagalug,
(At keng Kapampangan, nyang minuna “ipus,”)
Oreni ring sukat panabilin lubus:
Ban malaut tamung kabatingan gamit,
E maski na ninu yagkat da ban manik
At paluban karing pribadu yung silid,
Agyang karing kamag-anak dang malapit
O kakaluguran deti ban kanita
Malaut malyaring miparsalanan la,
Nung sakali karing meging bisita ra
Ating magatal a gamat a’yausan da.
Antimurin e la basta maniwala,
Karing kabud namu karen mamalita,
King y ‘boss’ o y ‘mam’ me-‘stroke’ yang bigla
At king ‘jewelry box’ atin lang papakua.
Dakal nang milyari a nu’ e mu pera
Ampon alahas ken ing akulimbat da
Ding ‘akyat bahay’ at ‘salisi gang’ ngara
King anti kanyan a kaparalanan da;
At metung pang ‘modus operandi’ reti
Ya’ytang nung atin kang bayung seling TV,
O nanu mang ‘electronic gadget’ ngeni,
Asna kalagua rang akwa ring salbahi;
Kapamilatan ning sarya reng puntalan
Ing bale na mismu ning mekasaling yan,
At ding ‘katulong’ ken a pihu rang dasan
Ilang pakikuanan da reting amulangan.
At anti keni ing karelang diskarti:
Ikami pu ngara’ing tinubud ning ‘boss’ mi
Ba’miyang kuanan ing papalit nang TV
Ning ‘sir’ yu nung inya delanan mi ne’yti.
Map a map, e misdan keng atut ning kambing
Ing katulong inya ibie ne’yting tambing
At e pamu maus ba’nang atalingting
King ‘boss’ na nung tutu ing papakua ne pin.
Kasi, e na man king tutodusan ta’la
Ding kasaup, pero menasa monu la
At kaagad-agad deti manwala la,
Uling king ugaling mayap den sane la.
At e la masulit pakisabyan deti
Uling king ugaling malam la pin kasi
Miyanad at alang isipan parati
Nu’ne king kaparang tau maki-anti
Uli ning menasa anad la king mayap
A ugali ampon pamirapat-dapat,
Iting mesaglawe bage e masampat
Menasa e ra man balu reti mekad.
Inya pepauna ku na babo niti
Ing aku ala kung paturan kaniti,
Nu’ne king bage yan anti kung magsisti
Banting alisyan ing posibleng malyari!
