Pero e pu anting den pagsisti ta’la,
macananu ta’yang ausan ‘Asan’ ngara
particular ken king balen ning Candaba,
at bebe ning ‘Rio de Grande Pampanga’
Nung nu’ ding asan ken angga na king dagat
asabi tang’ matni akit mong’ lalatuat
lalu’t ken dane ning Masantol, iniasa’t
ausan deng ‘Asan’ ing ‘Pindang a Damulag?’
Nanu ing ‘Asan’ mu ngacu, alimbawa
nang’ ipakibat mu nung talbus apalya
a pemulug mu keng balatung o caya
sigang babi ing linutu nang Ima?
Iti mapaliaring yang acasanayan
ding ninunu tamu king insa’mang lugal
a nu’ ing salitang ‘Asan,’ amulatan
da nia iti caring mesabing balayan.
Salitang ‘salangi’ mampit ya Arayat,
‘salangi – sindian ing puritan a de gas;
at careng balen a tyu lele ning dagat,
‘salangi’ – paindalan de iti nung igcas.
‘Sapacan’ – catmuan ing cabaldugan na,
pero king salitang ‘tumbucan’ lulub ya;
‘talasan’ tucluan ya matulid a sabi,
pero dane mawli, ‘itais’ ya iti.
‘Salatan’ – apisan ing cabaldugan na nian
cabang ‘makisalat’ – ing ken metung na pang
cabaldugan niti king salitang menan
o king ngara pin pu Sabing Capampangan.
‘Kine’ – kebit, lilan ing metung a bage
‘Selasan’ – inayus o pipatung-patung
‘Telatag’ – inareglu nung nu’ dapat ika
‘Pitumpac-tumpac’ – pipatung-patung
Ing casebian a ‘ugaling basan’
mapamiasa ing buri nang sabian;
mapaniawad pero e la biasang mamie,
iniasa’t basan ing carelang cayarle.
Ing salitang ‘api’ adua ya pupuntan
ing metung ya pin panangab kakanan;
ing cadua ya itang pupulis keng samat
ding mamama iniang yan e pa linipas.
Matni ya ing tukil nung ala yang laman,
pakicumpara re keng taung mayabang;
uling nung sapac ya’yti keng macalulan,
agiang calingking mu ala cang damdaman.
Ing taung matamad, mangalbag keng tutud,
king pagkeran pane mung macabaluctut,
den ila ring ngara pin tacla mang manuk
potang mibangun la ala nong’ apulut.
Ala nang muna keng tau, magsicap ya
para king sarili at kapamilya na,
e itang potang yan mapusyo ne lupa
carin ya sisisi, tadtad neng rayuma.
Uling nanan ta’mang ibalic ing napun,
iti angga mu king e matda king ucul;
kase, ban ibalic cusad ing panahun,
ing Dios yamu kabud ing ken mamanahun!
