I PISUK at Daisy maluat nong’ magsyota
Pero den e la pa memasyal bitasa
O menalbe sine ila kabud adua
Uling ining Pisuk busy ya menasa
At ining babai a girlfriend nang Pisuk
Serbidora neman keng metung a Fastfood
Nung inya misan man e la pa melaus
Linual banting mag-date at keng otel linub.
Pero pagmulalan na nining babai
Nung bakit i Pisuk sumangid ning iti
Busy ya ngana keng pipagobran niti
Madalas alayu potang ayan ne’yti.
Misan apilit ne ning Daisy i Pisuk
Ban paynawa la keng motel king Tulauk,
Nung inya ikua ra muring mibalaus
Keng planu da reting keng otel matudtud.
“Balu mu dear” ngana ning Pisuk kang Daisy,
“Ika pa keng bie ku ing dela ku keti.”
“Uh, manwala ku keka? Dakal lang sasabi
Ing ika madalas ka keng otel a ini!”
“Ika pa mu rugu,” ngana king babai;
“Maglaram ka” nganing pekibat nang Daisy.
“Wa, aminan ku na madalas ku keni,
Pero ika pang girl a dela ku keti!”
Ing migkonsulta king doktor
I JUAN, pikabaluan, agpang king istorya
Bukud king asne king katamad, liñgo ya,
Inya naman agyang idad neng singkwenta
E na pa aisip ing pamakiasawa.
At uli ning iti ulila neng lubus,
Asu nia at pusa ing kayang kalukup;
At den king aldo-aldo ila rugu kabud
Kasulu nang pane, kayabe matudtud.
Makanian man agiang maki-apalya ya
Keng gulut ngara pin, daranup aliya,
Uling ding kasamak da ring pengari na
Atin lang yatad a dake king pupul da.
At iti pin ya ing kayang pangabiayan
Ampon para gastus niti keng pamangan;
Mupin, agyang e ya daranup intasang
Madalas tiktak ya keng kapangalingwan.
Misan, kabud namu anti yang mipakde
Kabang mamaduas ya gilid na ning tete,
Kasi aisip na ing pabalikan ne
Ning doktor a nu’ya misan pepalawe.
King ba’nang abalu ing meging resulta
Ning king doktor a iti pamagkonsulta na,
Kaybat nang tiparan ing egana-gana
A penabilin na ning linawe kaya.
“Dok, aku’ytang migpa-ulu banwang metung”
“Wa, balu ra ka pa” ngana niting doktor;
“Ikutang ku mu sa’ nung malyari na kung
Mandilu uli ning ala kung sipun”!
