ING BELWAN, nanu ya keti babo yatu
Nanung ulaga na keka at kanaku?
At nanung upayang singkap na king tau
Ban king bie na niti igalang deng ustu?
Iti, ya ing talas nang isip at diwa
A bukud mung keya binie nang Bathala,
Ban e maging mangmang keti king masala,
At agamit ne’yti king mayap a tangka.
Dapot yan, nung e ne king mayap gamitan
Ning makalmang keya iti mipagkalam,
Mekad maging mitsa ne ken king dewakan
Ning ganid a diwa ring mapanalipan.
Linto na’t meyakit karing mengalabas,
King ing sobrang belwan yang pasari at sukat
Keng e makataung sengilan ding armas
A inimbentu ra ding biasa at pantas!
At nung e masagka pamipalpakasan dang
Gelingan king syensya ding milulutlutan,
Miras e mikabla, ing mas masangil pang
Ipasari deti king yatung karinan.
Milalung kabiasnan, e mu naman mayap
Nung king parang-tau e maging masampat,
Anti na mo’ ngeni dening matuang syudad
A kabalitan keng nyuklar deting armas!
Pero nung iti sa’ king mayap magamit
At keti king yatu e munie panganib,
Makasanting iti king insa’ mang panig –
Pamipa-patayan… ganap nang mituklip.
Nanung ulaga ning upaya’t sikanan
Nung ing ipasari niti matsura ngan?
Mekalibung buri tana’ing kamangmangan
Kesa king kamandag nang bitbit ning belwan.
Kabiasnan, makanian ka pala king karok
Kabud milub ka king taung e maka-Dios?
O mayapang kaku ala kang tibubus,
Mie kung malaut king bage a makasnuk!
Anti ngeni reting bansang mipalkasan
King talino bitbit dang e karaniwan,
Yan kaya e anting tabak a miyumang
King tulid dang salu ring sablang lelangan?
A, e pin malaut ing kekata miras
Ing panganib niting maka-ambang tabak,
Kabud ing belwan da ding bansang mautak
King kayabangan da e la mipalabas?
At e murin naman malaut gawan da
Kekata ring bansang antimo ing Tsina,
North Korea ampo pa ring aliwa pa
Ing sakupan da ing e para karela.
A kalupa na ning gewa na ning Japan
Inyang kabud namu bigla yang dinatang,
At kulang namu ing e no’ pemate ngan
Ding keti disan nang alang kapagsadyan!
Oyan, mayayakit, e wari ing Tsina,
Pane na ka’tamung pautangan pera
Pero ditak-ditak, malino kakua ya
Karing isla tamung makasigi keya?
Inya e malaut ing maging bunga n’yan,
Mabilug a bansa kunan ne’t sakupan
Kabud minyingil ya’t e ta’ abayaran
Ing kekata kusa niting pepautang!
(Kabiasnan, nung e re king mayap isunis,
Ding insanu pa mang mayupaya’t bwangis,
Datang ing panahun – kulyo na’t kulait
Ing mipapamisan, maramdam a tangis!)
