‘NANAY’ king masayang Aldo mung Kebaitan
ala keng malyaring kekayu ayampang,
nu’ne panalala’t lusuk a pakamal
para king matapat yung pamanungkulan.
At nung makananung ganap a panyulung
para king Pampanga ing kekong intensyun,
pihung e mikabla datang ing panahun
mamrimera tamu keti king ‘3rd Region’
Keng agrikultura, komersyu’t industrya
keti Sentral Luzon itang manimuna
inya mangaintulid mung ganap suporta
ing keya ibie ta’ karing programa na.
Pilan nong’ mirinan atensyun medikal
a’yalang ibayad banting pa-ospital?
Uli na pelalung kasaupan pinansyal
agawa nang ipagkalub karing dakal.
Wa, pablasang ibat pa ngara king anak
tagle na’na iting ugaling masampat
a nu’ abli na lang paninda, madalas
pamie na la karing alang saling abias?
At uli ning likas na kang ‘Nanay Baby’
ing malam ampon e ya makasarili,
makasiguru tang’ angga na king tauli
nang aldo keng puestu, e paimburis iti.
Oyan gagawan na ing eganagana
a sukat pagobran para king Pampanga,
nung nu’ pati na ing personal nang bulsa
maralas midame keng pamaniaup na.
Gigisan yang oras a e mamagkanu
king keyang matapat a pamagserbisyu
ban ing bage sukat tutukan nang ustu
e miligta lalam nang pamangubyernu.
Antimo pin ketang Juebes a milabas,
ken ‘Kingsborough Convention Center, merapat
ing ‘summit’ a nung nu’ vs. illegal drugs,
ing temang gigulan dang makabang oras.
At nung kabilang la karing pesidalo
di Gob, ing director ning PDEA mismo,
mayors, barangay chairs, at y Tito Sotto
ampon aliwa pang pawang ‘de titulo’
Inya kaugne na ning Aldo ring Pusu
at ning kumpleañu na – ing pekamalagu
malyaring idake king aldo mituldu,
lugud at suportang maglapo king salu.
At ipagkalam na sa’ ning Mayupaya
keka ‘Nanay’ ing bie a makabang bina
ban ing kasuywan mu king balen kumaba
Kagum na ning kekang likas a ganaka.
Paniwalan mi pu bilang Kapampangan
ing ikayu bukud malyaring aligan
at posibleng munye ganap kapanayan
karing ‘constituents’ yung atyu keng kalukan,
Inyasa’t aduan mi ikeng kabalen yu
ngening kayaldawan ning kebaitan yu,
ing sana itulut na ning Apung Ginu,
ing pakaban ne pa ing kekang pabelu.
Ban ing kasaupan mu lalu’t karing ala
yan misundu bista man pansamantala,
lalam ning gubyernung malugud maluka
a pangasiwan ning anti ka ganaka!
