HALOS limang taon na ang nakaraan
Mula nang maganap ang karumaldumal
Na krimeng sa tala nitong kasaysayan
Ng ‘politic related’ na pamamaslang
Ng mga salarin sa napakalagim
Na ginawang walang habas na pagkitil
Sa buhay ng mahigit sa limampung ‘victims,’
Na produkto ng ‘worst political killing’
Na naganap sa bayan ng Ampatuan,
At kung saan tatlumpu’t apat ang bilang
Nitong kapatid natin sa hanabuhay
Ang sinampalad ibuwis ang buhay
Sa pagsama nila sa ‘convoy’ ng Misis
Ni Mangudadatu para maihatid
Nito sa Comelec ang mga COCs
Ng partido nila sa ‘provincial office’
Ng Comelec mismo kasama ang Media
Upang umalalay sila sa pagpunta
Ni Mam Mangudadatu sa pag-‘file’ niya
Ng kandidatura ng kanyang asawa.
Ngunit bago pa man sila makarating
Sa takdang lugar kung saan dapat dalhin
Ay hinarang na nga ng mga salarin
At basta na lamang din pinagbabaril
Ng hinihinalang mga ‘private army’
Nitong katunggaling ‘political party,’
Kung saan lahat na, lalaki’t babae
Ay kinatay n’yan ng parang baboy pati!
Matatandaang si Andal Ampatuan,
Na isa sa anak ng matandang Andal
Ang itinuturong utak ng pagpaslang
Ng mga testigo sa krimeng naturan.
Pero hanggang ngayon sa kabila nitong
May mga testigo na ang ‘prosecution’
Para ang kaso ay tuluyang gumulong
Ay nanatili pa ring usad pagong
At ang ilang ‘vital witness’ na kailangang
Tumayo upang ang kaso ay gumalaw,
Di malaman nitong kinauukulan
Kung bakit ang bista’y di mapasimulan.
At ang masaklap ay unti-unti silang
Nawawala basta sa kanilang lugar,
Kundi man marahil ay umatras na yan
Ay baka tuluyan ng ipinapatay
Nitong mga ‘accused’ sa naturang kaso
Upang sila’y di na makapagtestigo;
At uusad pa nga ba yan kung ganito
Ang kahantungan nyan sa ating husgado?
At kung kagaya nyan na animo’y pagong
Kung magsikilos ang mga ‘prosecutors,
Men in robe’ at ibang mga abogadong
Nakasanayan na ang katagang ‘postpone’
Ay saan na kaya itong ‘Maguindanao
Massacre’ posibleng tunay na hahantong?
Lalo’t tulad nitong ang Administrasyon
Ay tila wala ring ‘favorable action’
Hinggil sa isyung yan na tanging ang Media
Ang di tumitigil sa pag-alaala
Sa pamamagitan ng pagsama-sama
Nilang pag-gunita sa mga biktima.
Isa ang samahan ng mamamahayag
Dito sa Pampanga sa di umaatras
Sa laban sukdulang sila ay dumanas
Ng pananakot sa aming pagkalampag!
