‘Kapit Bisig ng Mag-aaral’nina Alex Cauguiran binigyang parangal

    141
    0
    SHARE

    (Karugtong ng sinundang isyu)

    At sina Atty. Rodriguez at EdPam
    Na parehong mayor sa kasalukuyan
    Ang nagsilbing mga tagapagtanggol niyan
    Upang mailabas sila sa kulungan.

    Na di nagkait ng kanilang suporta
    Sa kilusan upang magabayan sila,
    Sukdang pati buhay at propesyon nila
    Ay malagay din sa panganib sa tuwina

    Saka si Atty. Juanito Velasco
    Noong ‘martial law’ at sa Edsa rin mismo
    Nang patalsikin na ang dating Pangulo
    Na si Apo Lakay sa pangungubyerno.

    At ngayon matapos ang tatlong dekada,
    Sina Alex at ang mga nakasama
    Sa pagtuligsa sa rehimeng diktadura,
    Ay pamuling minsan pang nagkita-kita

    Sa HAU upang muling gunitain
    Ang nakalipas na pagsuong sa dilim
    Ng kanilang noon ay ‘Student Council’
    Laban sa isang pamahalaang mapaniil.

    (At kamay na bakal ang pina-iiral
    Para manatili lang sa katungkulan;
    At magpakabusog sa Kaban ng Bayan
    Habang nagugutom ang nasasakupan).

    “Na kung tutuusin” ani Cauguiran,
    “Ang sirkumstansya at mga katauhan
    Na hinarap natin saka nilabanan
    Nang panahong iyon ay di napalitan

    Kundi sa ibang mukha at mga pangalan,
    Kaya marapat lang nating saluduhan
    Ang kasamang hanggang ngayo’y lumalaban
    Pagkat di pa naman lubos na nakamtan

    Ang mithing paglaya nitong mamamayan
    Sa kaapihan at mga kahirapan”;
    (Kundi bagkus lumalaon, tumatagal
    Lalong bumibigat ang pasang krus ni Juan?)  
                 
    Yan ang panimulang binigkas ni Alex
    Sa Reunion nilang mga magka-‘classmates’
    Nang magkita-kita ang ‘staff & writers’
    Ng kanilang ‘school organ’ na ANGELITE.

    At aniya ay tila raw napapanahon
    Ang muling pagkikita n’yan sa Reunion,
    Pagkat itong ating mamamayan ngayon
    Nahaharap muli sa isang situasyon

    Na di nalalayo sa ipinaglaban
    Ng “Kapit Bisig ng mga Mag-aaral”
    Noong ang naghari sa ‘ting kapuluan
    Ay diktadura at batas ng militar.

    (At bale wala na ang ating husgado,
    Kundi kagustuhan ng ehekutibo;
    Ng dahil lamang sa ang dating Pangulo
    May ginawang laban sa mga Aquino?)

    Ano’t-ano pa man… itong mag-aaral
    Na dating kasapi sa isang kilusan,
    Laban sa mapang-aping pamahalaan
    Ay marapat lang na mabigyang parangal.

    Sa naging papel n’yan o partisipasyon
    Sa isang aktibong samahang sinuong
    Ang lahat pati na ang sila’y makulong
    Makalag lamang ang pagkagapos noon

    Ng Inang Bayan sa dikta ng ‘martial law’
    Bilang isang ‘tribute’ na napapanahon;
    Para sa dakila nilang kontribusyon
    Sa pagsupil natin sa isang Diktador;

    At sana ay di na maulit ang gayon
    Na ang namayani’y mga kontra aksyon,
    Na di nalalayo sa relasyon ngayon
    Ng hudikatura at ni Mr. P-Noy!

    LEAVE A REPLY

    Please enter your comment!
    Please enter your name here