Home Opinion Kapaniausan karing mangaintulid

Kapaniausan karing mangaintulid

1827
0
SHARE

Kalupa ning sadya, pihung e la ditak
Ding alus megisan taliri king gamat
Karing mipakbungan king banuang milabas
Pasari ning alang ganap a pamingat.

At nu’ ila muring sukat parsalanan
Dening balu ra nang alang kapupuntan,
Nu’ne disgrasya mu, ot pigagastusan
Da ing anti karen a e ra nabangnan?

At nung e mu naman dening makigawa
Ila ring kareti gagamal menasa,
King panakitan den – ing sangkan inyasa,
Agyang bawal, lalabagan deting kusa.

Inya nanu’t ngening ila mu naman ken
Ding e mapamintu karing utus balen,
E wari, madalas atyu naman karen
Ing maging biktima ning syas dang buntuk den?

Partikular ken king parte ning Bulakan
O ken king Bocaue, ing kasisilaban
Pipagawan kwitis saka aliwa pang
Papakbung a sobra ken king pangasikan?

At pamisan-misan a mibabalitan
Kesilaban puesto o pabrika kaya
Ken ding ‘plapla’ ampo pa ping mialiwa
A klasing papakbung agpang keng balita?

Iting insidente na ken ning mialiwang
Disgrasya, a nung nu’ la kasisilaban
Ding ating negosyo anti mo pin kanyan,
Atyu na karen ing kaukulan takbang.

At ing kapamalan lokal ning probinsya
Na ning Bulakan ing kimut ban kanita
Ing problema inggil king mesabing tema,
Mirinan solusyon yan karing gamat da.

At e banua-banua, pane namu ing ken
Ating kepakbungan gamat king uli reng
Bawal a mialiwang klasing ping ‘firecrackers’
A kadisdisgrya tamu balang ‘new year’.

Inya kapaniawsan tamu king gobyernu
Partikular ken king Kongress at Senado,
Gawa lang batas a nung makananu
Rang aresolba yan king tamak at ustu.

At e anti ngening banwa-banwa alus
Ating taliri king gamat da metakmus
Ding aliwang anak, a kusa reng dimput
Ing rebentador a e agad misabug.

At itang pengari a sukat mantabe
Karing anak tamu, sukat tamung ike
King ustu ing karen tamu pamagbane,
Ban e la mimulat king alang kwentang bie!~

LEAVE A REPLY

Please enter your comment!
Please enter your name here