DING baryung e sadiang lalbug king San Simon
king mengalabas a makabang panaun,
den uli ning timbak dang dakal a gabun
midame pati na ing dalan ning danum
Kasi mitambunan pelalung salipsip
a daralanan ning agus a mabilis,
inia nanu’t e pin mikotu pulandit
ing danum uran neng ing lagusgus aplit?
Alang nang dalanan, malagua’t salita
ing danum king uli ring pelalung sapa
mibara king timbak dang ken miyayaliwa
klasing mineral ding atyu king upaya.
Kanitang minuna, ing mesabing lugal
e lalbug agia mang magsiyam-siyam ing uran;
pero ngeni uling ala nang pilualan,
magpondu na iti karetang asikan.
At oyan, ing ngara ‘mi’ yamu ing tugak
dane San Isidro ilang lalbug agad,
at ken ingTagulud, ken mung pilan oras
a sikan ning uran, ing malaguang sapak.
King maliliaring yan, kenu in parsala,
king konsehu ngene o karing minuna?
ninu’ng municipal engineer kanita
a siniasat karing ken penalakad da?
At nu’ gusali lang tiktak pangaragul,
a timbakan da pang lahar ampon gabun,
matas e palak king Camino de Quezon,
nanu’t e pin lumbug asna king karagul?
E ra’na wari man aisip bitasa
ding keng munisipyu tinalan upaya,
alang kapilisian, bisa la’t e bisa
king iti ing miras bukas o makadua?
Natural mung kabud mitas ya keng tambak
ing metung a lugal mababang e palak
keng dalan, nukarin tulandung at sukat
ing danum uran neng alang lualan agad?
Iti magpondu mu keng mababang lugal
at king e bitasang mitambakan mu man,
ayanti mo pin ding kalsadang melakuan
a ka-level da ring bale king barangay.
At ngeni pin iti ya ing sasaingsing
ken king San Isidro ning Konsehal Irene
(Dagdag) a dimdam ku’t ayalben keng ‘online
session’ ding konsehal tamug manga-galing.
E ta’ pasulitan ing simpli mung bage
king dapat lugalan, karin tamu ume,
“one plus one” mu iti, e ‘equation’ abe;
asna mu kalagua tamung asalese.
E kaya masanting, ing ubligan da la
rening mikibandi karening pabrika?
Ding anggang kanal a maluat nang mibara
pasibayu ta’lang pakulkul karela;
Imbes ing gubyernu, ya pa ing gumastus
at ken ing kaba’ning balen yang matalbus;
tutal pabrika la ring sangka’ning albug,
ila ring dapat ken mamakibat lubus.
Mupin nung sakali, makanian ing gawan
ning administrasyun ngening salukuyan;
ken mong pamalak yu, ninu ring mituran
karing minuna o ngeni manungkulan?
Dapot wa’ining kutang: mabisa la kayâ
paigastus la reti, antining den ata
dakal nala binie ken a miyayaliwa
agpang king ngeni pin lulual a balita?
Vhelle V. Garcia
October 25, 2020
Abu Dhabi
