1.
King Genesis na ning Lumang Tipan ngan masasambitla
yatung karinan ding tau lalang ne ning Mayupaya
kewani ne itang gabun a malangi king mabasa
gabun lalam ding danuman da ring dagat, ilug, sapa
at ing gabun king mamala a tuknangan da ring sabla
ing Guinung Diyos antimurin ing kaniti mikigawa
2.
pikawani na ing sala ampo ing karalumduman
ustung aldo agpang king Diyos apin ya ing kayaldawan
ing dalumdum ustung linto la ring batwin at ing bulan
a babie sala king yatu apin ing benging kaniglan
makakawani la naman ding mabibie king danuman
at mabibie king mamala ampon karing kagubatan
3.
Ing sablang bage king yatu tingka na na ngan ning Guinu
bayu na la pa lelangan ding minunang linto tau
penibala na karela ing nanu man keti yatu
a karelang akakit king kilub na ning paraisu
ing penabilin na ning Diyos kapilan man e migbayu
wa man i nunu tang Eba peisaul ya king tuksu
4.
Dapot ing malagung yatu ali ra ne lilingapan
kinalbu do retang bunduk ampo pa ring kagubatan
pati na ing pamagmina karelang peintulutan
ding aliwang pulitiku king ba la mung manakitan
inia ustung daratang na ing panaun ning kauran
daragus pababa’ing danum a king bunduk manibatan
5.
At uli ning mababa ya ining lugal ning Pampanga
danum a manibat babo kekatamu ngan pupunta
king milabas a panaun mamanuran man kanita
e neman masasalanta ing kekatamung prubinsiya
dapot ngeni kabukas pa’ing uran a keti durugpa
lulbug ne ing kekatamung lalawigan banwa-banwa
6.
At ustung dening memalen ta no ngan malilingasngas
ding kekatang manungkulan karita no manos gamat
ing maralas dang sasabian ala tamung akarapat
kaburian ning Guinu ngara ing dintang a kalamidad
ing karelang mamatulid king katutwan ngan taliwas
mekad uling ala na la rugung balung ipakibat
7.
Sana naman ing Guinung Diyos e da ne piyabe-abe
nung atin mang kalamidad uling iti e na binie
ing buri nang sabian a ing Masantul at Macabebe
kaburian ning mayupaya’ing albug a e na kakate?
ing tutu na ding flood control nung gewa rong masalese
ala na sanang albug a daranasan ta nang pane
8.
E wari ring tau mismung sinira king kalikasan
o kening naturalesa king amanung Kapampangan
a pigkalub na kanita kang Eba ampo kang Adan
a kekatamung amana inia dapat yang lingapan
dapot nanu ing depat da ring aliwang manungkulan
pepabustan deng mesira e re binang peulagan
9.
Ing renda na ning kalesa atyu karetang kutseru
ing gubyernu naman atyu karing manungkulan tamu
inia karing miyalbugan nung atin mang pasakoru
ali ra sasabiang e ra yayasa ngan king gubyernu
inia atyu ko king pwestu uling iti kaburian yu
at kaburian ding botanti a migtiwala kekayu
10.
Pikawani na ne ning Diyos ing danuman at mamala
a malino mababanggit makasulat king biblia
dapot uling sira ne ing kekatang naturalesa
ing awsan dang eco system e ne balanse tagana
neng kauran ustung lalbug kenu dapat ing parsala?
nun e karing tau’t ing Diyos ali da ne dadame pa
11.
Nung kapilan makalbug na karin la aplit sisiyasat
deting manungkulan karing flood control a mengatibag
ngeni lalto ing karelang munikalang mangasampat
ban kanita kanu ngara ining problema masamas
atin palang sulusyun ot kanita pa e ra depat
ding aliwang manungkulan tamung pikbungan ning mayap
