1.
Misan ining Simu minta ya dentista’
Ing sira ng ipan papasta ne sana’
dapot itang doktor sinabi na caya’
dapat neng bagutan uli ning pungpung ya’
2.
“Masakit pu yata ing pabagut ipan?
ngana namang Simung canitii mengutang
“magnerbius cu pu doc, nanu’ing cacung gawan?
mataloti cu pu caras king macanian”
3.
“Oneng buri cu ne taganang pabagut
uling ustung bengi e cu mipatudtud”
ngana ning dentista, “e na ca tatacut
atin cung panulu a pacasican lub”
4.
Lege ne ning doktor, alac a ALFONSU
at saca ne kitmu ing metung a basu’
“ustung inum me yan, sisiguraduan cu’
magi cang matapang pilan mung minutu”
5.
King capagnasan nang malagwang mabagut
Simu ing ipan na e ne mig adua lub
ing laman ning basu, tambing neng inalduc
mengapangisngis ya ampon mipapasyuc
6.
“O nanu” ? “magsilbi ta nang mag-umpisa”‘?
ing agad nang kitang caya ning dentista
“ditac pa pu doctor tagayan mu cu pa’
ngana niting Simung mepunge na mata”
7.
Caibat neng agisan itang caduang tage
ing lupa ng Simu icua ng melare
kitnan ne ning doctor nung ya matapang ne
ban mag-umpisa na king carelang pake
8.
“Wa matapang nacu”, nganang Simu canian
ing nanu mang bage e cu catacutan
ninu man ing tagin king sira cung ipan
balungusan ke at balbalan a sicang…
