Home Headlines Ing mitagurian ‘POOR BOY’ ning Lubao (Casuglung ning milabas a isyu)

Ing mitagurian ‘POOR BOY’ ning Lubao (Casuglung ning milabas a isyu)

188
0
SHARE

At nung atin la mang
Bubusbus canitang ya’pang macalucluc,
Ya’ytang king RCA,
A nung nu’re iti dimanda na cabud;
Abias ning gubyernu
Gewa nang otsenta sentimus ing salup,
King agia mang iti
Inangkat na niting migit nang mamesus;
Nanung pekibat na?
Burian ku pa nganang king suculan lungub,
Kesa king akit cung
Ding pacacalulu mate la keng danup;

Bilang Presidente,
Tungculan cu ngana itang magdesisyun
Dikil king nanu mang
Bage mangailangan malaguang atensyun;
Obat e cu yutus
Ibenta nang mura ning Administrasyun,
Ngening ding keraclan
Keng camal ning abias, den ala lang itun?
Yan para canacu,
Ipamie cu namu nganing keyang siglung
Nung yang ipagcalam
Ning calma cung mayap king tacdang panaun.

Angga na king miras
At mepupus ganap ing keyang tungculan,
E ya meging ‘corrupt’
Ing lagyung DIOSDADO PANGAN MACAPAGAL,
At waman ala yang
Dacal a pibandian, saku-sakung dolyar
A macapanilas
Caring mangaragul a bangku Switzerland,
Ya e miulingan
A gamat king kelan marine at capal
Na lupa, pablasang
Mete yang marangal, alang musing ditman.

Inia naman angga
Na king dinulung ya king marimlang aun,
E mebawas ditman
Ing sablang capurian a keya miputung;
Pablasang balu nang
Mistula ning Balen king i Mamang Dadong
Kikilalanan de
Gelingan pati na king aliwang nasyun,
A sucat ibilang
Caring mayap diling linucluc Pecapun,
Ning insa’ mang lipi
Keng cayapan talan at mugit king timun!

Iti, macuyad yang
Talambie ning meging mapuri nang anac
Ning balen tang tibuan
A sale ning santing, ning leguan at tindag;
Yan king capilan man
Keti Capampangan larawan yang maslag
A e na mabating
A kislap nung wari king Tala ning Munag;
Modelu yang sucat
Taluntunan king bie ing dalan nang dilpac,
Ban bucas, macadua
Atin pang anti’ya a lunsut king labuad!

LEAVE A REPLY

Please enter your comment!
Please enter your name here