1.
I Tonyu atin yang ugaling e mayap
ding calugura’na tutung e ra capad
ustung ating ikit a macamulaclac
gulungan ne saca pamasdanan agad
2.
King kilub dang clasi e ya rin patugut
mamasdanan caring mimisip malaut
nung e no bulyon den ban lang mipakirut
tampiyan no tundun o pitican balugbug
3.
Pelalung ding cayang waling mangalati
acasaman de king anti tang ugali
uling ketang misan mepaltus ya labi
bungsu nang capatad king sabo mapali
4.
Maracal nong bina retang micacamas
ketang agawian nang birung e masampat
ing siping nang bale ampon camag-anac
e no ngan matula ketang cayang dapat
5.
Bistaman maralas deng sabyanan iti’
king gawi nang ita ding cayang pengari’
e na man sicasu, sasabyan da reti’
gulutan na la mu at saca ya maili’
6.
Dapot ketang misan anti waring signus
mipaindalan ya caretang manurud
pacacalale yang king barbirya linub
ginulisac matni, king dalig dinugdug
7.
Misdan ya’ing barberu inia king labajas
a tatalnan niti icwa neng alaslas
king gulung-gulungan ing taung pabalbas
a mipasageuc at minyalicadcad
8.
Pigsisian ng Tonyu itang arapat na’
dapot tauli na ngan ing egana-gana’
king matsurang biru ing meging resulta”
apate ne niti ing carelang tata’
