Ampon masiri keng pamangwang baldugan
Ala nang miparis
O magpang-adua keng kalibri nang Teban;
Iti, e magmintis,
Alang milabas ken a e na pikwanan
Karing mamye paib-siks
O paninda ngarang yaluk da king dalan.
Ding kayang sapatus
A ngana ing deti imported la kanu,
Lima la pang pesus
Ding abie na bilang peka-antisipu;
Kaybat itang baldug,
Agpang king manyingil a menaluk kaku,
Kinsenas, mapupus…
O dipendi misan king aldo ning sueldu.
Pati kayang medyas,
Baldugan la namang kinwa na kanita;
E ya pa man bayad,
Sira no’ sakung ding minunang kinwa na;
Menutang yang kwintas,
Singsing ampon relo – maglima nong’ banwa…
Ikwa nang melapad,
Talampakan Bumbay keng kasisingil na.
Matikas yang tutu,
At e mu isipan ing kayang susulud,
Pemanutang namu,
O kinwa nang ‘ten gives’ a mababa baldug;
Matas man ing tubu,
O migit pang tripli ing kaya ra yaluk,
Tiak lang mikasundu,
Waman kaybat nita pihung sakit buntuk!
Lon me ibat lalam,
Matikdi ya porma at kagalang-galang;
Nya e mu isipan,
King ing susulud na kinwa nang baldugan;
Mupin, ing sulit n’yan,
Potang maglakad ya o lumwal keng dalan,
Yang pisisitsitan,
Detang maindredus, mapad keng makanyan.
At malyap ya mata,
Potang atiyu iti keng dalan maglakad,
Uling magkang pota,
Ding pikautangnan akit de’yti mekad;
Yan, uling dapat na –
Misan king agya mang ating kaya sabat,
Matinu yang mentra,
At magaling gawang sangkan ban e maswat.
Kesyo, king ngana pin
“Pilan nang aldo ya panenayan da ka,
Uli na ning atin
A talaga sanang ibayad ku keka;
Mipaintagun nandin,
Makakera ke pa ning kakung asawa,
Detangan na ke’ ning
Katwangan kung buysit – binye no’ pa kaya.
Mialiwa nang sangkan
A talaga namang masulit panwalan,
Ing balu rang sabyan
Ding keraklan karing makunyat singilan;
Kalupa na’mo nyan,
A meka-tupa kang antimo kang Teban,
Yan, kamamaulyan –
King inutang niti e ne mamayad yan!
(Atin yang kasuglung)
