Home Opinion Ing kwentu tungkul kang Teban a bugnut

Ing kwentu tungkul kang Teban a bugnut

672
0
SHARE

Nung ating ngara ken sobra kabastusan
Ala nang mibas keng ugali nang Teban.
Maganaka ya nung balu meng bagayan
King dapat na niti a e pikasaban.

Alimbawa inandam me ing palang na
At pemalaba meng sanga ning akasya,
Potang isubli me at apansinan na
Ing atin yang bungal, e na sabyan keka.

Ing palang na mismu ing keta palmuran
Nang alang patugut king kekang arapan,
Inya ika ngeni a keya menamdam,
E ka maybug lumbug keng pirurungutan?

Misan, ing tegawan na mismu keng binyag
ning keyang pangane, ing mendam damulag.
Inyang isubli re’t akit neng mapawas,
Uling gagalang ne, e niamu bubulad.

Pero king sarili ning bugnut a Teban
Mikakaluku ya salu at pitaklan.
E na asabi king kumpari nang mendam,
Ot ing damulag na sinobra ya pagal?

“Miyadia ka, aku namang manandam bukas
King bangka mu”, nganing king isip na gaglas;
Kasake na, aplit neng piliwas-liwas
Bigse kaili’t waman ing bangkang tutulas.

Inyang apansinan na’ing bula keng danum
A masasangal king mangalating alun,
Lalu nang penaplit at pisusun-susun
Ing pamamagse nang ala keng direksyun.

At inyang magal ne king alang patugut
A kababagse na, mesakit ya gulut.
Kanyan na aisip ninhTeban a bugnut,
Ing ya king sarili na ing linto buguk!

Ating makanyan klasing panugali
Karing ing balu ra mas lamang ing mali,
Kesa king makatud a patuki-tuki
King armonya da ring tune rang kauri.

At alang pamaki-parang tau, saka
Kelan king sarili reting disiplina
Inysa’t pin deti pangingilagan la
King e ikapuri ning panugali ra.

Misan, inandam ke ing kayang panabud
Ban king panangab kung dutung ipangutud,
Uling mebungal ya keng sias ning sampaluk,
Sukat mung ing palang, yugse ne king ilug?

Umpisa kanita nanu pa mag bage
A kasangkapan na keng pibale-bale,
E ku ne unabis king dila siglawe
Ing karaptanan nang mapamalkarine.

At king kaisipan tintu ku ing e na
Makiandaman nanu pa mang bage kaya,
Antining pati ing ken pamangilala
Ku kang Teban bilang Amigo, ala na!

LEAVE A REPLY

Please enter your comment!
Please enter your name here