KABANATA 3E
Salesayan Tamu Ing Milabas
Ibat ketang manga 1974, at angga na ngeni, ating mapilan a pantas king Unibersidad ning Pilipinas a parating manamuyut karing talaturu ampon talasulat ing pabalu da ne sanang pabalu karing kabansa tamu ing kasaysayan tamu king kapamilatan ning pamaniulat o pamagsalitang Pilipinu, at pamanisip isip Pilipinu. Menimuna ya karen i Zeus A Salazar a, uli na nita, mibansagang “Father of New Philippine Historiography”.
Gilutan da dening pantas a reni itang Pansilang Pananaw da reng Kastila ampong Amerikanu. At gilutan da naman itang Pangkaming Pananaw da detang Pilipinung miaua king pulay ning isip da dening aduang banyagang deni.
Ing inarapan da ya pin itang inaus dang “Pantayong Pananaw” (PP). Keng Kapampangan, “Kekatamung Panlalaue”. Ita-itamu mirungutdungut tayang pisasabian, pagaralan, sasalesayan itang kekatamung milabas a bie bilang Pilipinu king kekaba ning panaun. At ing gagauan tang iyan inaus deng “Bagong Kasaysayan” (BK). “Bayung Kasalesayan”, keng amanung Kapampangan. Sasabian tamu “Bayu”, pablasang atin ta nang kasaysayan ketang minunang panaun, anti ing pisabi tamu ketang Kabanata 3B. Mu pin, giluan da ita ding Kastila ampon ding Amerikanu. (Reyes 2002: 7-10; 554-555; more thoroughly, 354-555. Moralina 2009. Guillermo 2003).
Ngeni, uling balu tana itang agus a “kasaysayan-historia-history-bagong kasaysayan”, anggiang e ta na sasabiang “bagong kasaysayan”, nun e “kasaysayan” namu , ban e ta malilitu. Kekatamu namang Kapampangan, anggiang e ta na sasabiang “bayung kasalesayan”, makagyu namu ing sabian tang “kasalesayan”. Ania makanian ing gauan tamu kening kekatamung pamibulebule.
Ing bini (the seed) ning kasalesayan ning Kapampangan pinla ne king gabun Don Mariano A. Henson king kapamilatan da ding keang sinulat inggil king Kapampangan. Uli na nita mibansagan yang “Father of Kapampangan Studies”. Anggiang keng amanung Inglis la misulat ding aklat na, aliua karing Amerikanu nala ingit pabasa, nun e kekatamung ka-Kapampangan na. Bina nong dakal kanita ding Kapampangan a biasing-biasang Inglis.
Keta namang 1972, melimbag ya itang The Pampangans: Colonial Society in a Philippine Province. E ya Kapampangan, e ya Pilipinu ing sinulat, nun e Amerikanu ya. Mitagun mu rin king ketang panaun a ita, kanita ya magsamula itang kilusang PP ampong BK king UP.
(Abatan ya ing kasuglung)
