Frank M. Guinto:
Kening kanakung kabilian, mengari kung lakandiwa
Maglibutad king Crissotan, keng pamibadbaran diwa
Ban suryan la at timbangan ding panig dang ipamingwa
Karing puntus at ‘rebuttal’ a yapse ra ding makudta;
Kening pamanalakaran atitiak kung alang mimwa
Imbut ku mung mamilatan keng misasagsagang nasa.
Pekatibe ke balangkas, ing talete miraragsa
Ban dalakit, misausig, tuknang nong’ misasagupa;
Penabi ku ing dalumdum ban tumindag itang sala
King tapat a pamangambul mal tang Sisuan a Salita
Inya aduan ku kekongan dapat tang mipanupaya
Ban magluid at managumpe…ing parasan tang dakila
Buklud ning pamisanmetung bidbiran yang pakatali
E man king kadenang bakal, nune king matbud mung pisi!
Agyang tanikala ya pa nung e mitugma’ng ugali
Keng gulyutan mapatlud ya… ing bigkis ta mitabili!
Dapot nung misausig at balang metung tukyan buri
Matibe ya pa keng bakal… ing sinulad a malati.
Dolly Gigante-Ferrer:
Tumibe yang anting bakal ing sinulad a malati
Nung byasa tang manimbangan king kekatang pangabili,
Nung buri ta’la mang igkas ding salitang mangapali
E la agad sang’ papalual karing kekatamung labi;
Anting metung a poeta kekata lang pakasuri
Ding bibigkas tang amanu kanita e ta magmali.
Kanyang sabing e masanting nung atin tang aramdaman
Magkunawari ka pang maklak at emu na pakibatan,
E na buring sabyan nita, iti kekang tatanggapan;
Itang pali nang darala nung yan kekang salubungan
Malwat yu nang pamiabe mayala mung kabaldugan,
Inya ing lablab ning api king danum kekang parimlan.
Potang kekang aparimla itang bayang busuk-busuk
Bilang metung karing WATAS kanita mu no ibugnus
Ding amanung kekang ibie, mangapinu at malambut,
Bangkanita e masira ing kekong pamikalugud;
Ing kekayung pamiabe nung iti e mapapatlud
King buri yung pakirasan… miras kayu king taluktuk!
F.M. Garcia:
Karing inapse yung sabi a malagung alimbawa
Ning masanting a ugnayan at parasan a dakila,
King agiamang atinayu king karinan nang Bathala
Y Tirso G. Lacanilao yang kanakung aganaka,
Neng mangasal ya kanita ing Mayor a maganaka,
King malating sinulad a kening tema mesambitla.
Pablasang ing kalambalan a sinulad kayabe ya
Karing sangkap keng kasal a magagawa keng arap na;
Patalan ne ing sikoti ning sinulad king esposa
At ing kasumangid niti para king maging asawa;
Kaibat, igutan ye nganing Mayor karing aralan na,
Lon tamu nung e mapatlud kabud misalangsangan la.
Inya mangabaldugan mu king ing nanu pa mang bage
A imbut tang pakirasan mapalyaring managumpe
Nung ing metung at metung ken misausig la’t miugne
Para king banal a layun ning tinatag tang’ pamiabe
Ampon pamisamak lubus ding poeta’t talagale,
A ngeni mibuklud-buklud king tagimpan a dalise;
A ing sana bandang bukas lalu ta’ pang apalablab
Ing ngeni paritak-ditak sisiro nang mayling abak
Ning kultura’t manang Sabi a megambul kaniang lingap
Ampon e matating lugud ding makudta niting watas
A nu’ ditman king pusu ra e kinawang agiang ditak
Ing lugud king manang Sabi a sinese rang mataktak!
