(Kasuglung ning milabas a isyu)
Dapot uling nanu pa mang
Buluc singo sapilitan,
Aduang aldo e miliban
Mika-report king Barangay
Ing ating babai ngarang
Ikit ding aduang manasan,
King sapa makadalampang,
At alang saplot nanu man.
At niang caibat nang malawe
Caring SOCO niting bangke,
Keta… ding balu rang luse,
Gisan dong’ decap, inabe;
At waman ya e no’ male
Nung ring mecamate,
Uling cayabe reng pane –
Ketang kasu ya midame.
Sasyo na, inosenti ya
Dapot nanung agawa na?
Ngening ding cabarcada na
Diname re king casu ra;
Ninung maging testigu na
Ban ing Corte manwala ya?
Cadua, ing abugadu na
E megobra para caya!
Wayta, atyu pa pin carin
Kilub ning paldas a carsil;
At detang congcretung dingding
Ilang acakit nang tambing
King balang cayang pangising
King tudtud nang alanganin;
At ngeni sisisian na pin
Iting miras a pagbitkil.
Kelan justisya’t masabal
Ing king parang-tau misan,
At nung inia king lipunan
Ding calulu’t alang beluan
Ing “Just Tiis” yang mimiral,
Laban caring mayacayan;
(Pablasang king nanu pa man,
Salapi ing mamilatan).
Capilan pa caya miras
Maging pante ya ing batas
King timbangan a parehas
Ning calulu’t anac pawas
At ning mabandi at pantas?
Yan, angga na king magwacas
Ing sabla king banuang matas
Keti sulip e mipaspas!
At pilan la pang anti ya
Ding masucul alang sala,
Ngening ing piparusan na
Ning aligan tang’ justisya,
E bucud macarikil ya
Caring taung micasala?
Nune maging cacu’t keca
Nung ma’yalang calma cata!
Misan, ing batas ning tau
E nayun king Apung Ginu;
Uling e man atanggap mu
King timbangan a e pihu,
E magbabo ing calulu;
Lalu’t nanu mang opisyu,
Cualta ing maging panulu
Ban pagobran na kang ustu!
