(Kaugne ning pamagmasusi king “Aldo ning Amanung Sisuan”, a mararapat balang tauling Biernes ning Agosto, malugud neng yampang ning maluka yung talasulat iting poesiang makatuki bilang kontribusyon na king mesabing okasyun).
Tau mibait ya king karinan ning lua
Ala yang bitbit yan, lubas yang bitasa;
Karamput a sabi a igkas ning dila,
Alang balu dit’man, pipi yang mistula;
Iti, mimulat ya king pabagia-bagia
Potang itang Indu ta’ne pagtumaila.
Kabang pasusuan ne at pakikisabian
Ning Inda, ing anak babo nang kandungan,
King paritak-ditak akua rang mitanam
Ding balang kataya king diwa’t panamdam
Angga king abalu ne ing Sabing menan
A kemulatan na kang Indung ibatan.
At iti ing Sabing idala nang dagul
Ibat king bingut ya’t banayad daragul;
Pablasang kambe ning masampat a payul
King yan ing Salita a sukat magambul,
Kapilan man e ya kalangian a sibul
Nung wari keng batis ing Sabing keragul.
Uling nung iti yang masese king labi
Ding balang penganak ibat king malati,
Ing Amanung Sisuan asabi tang’ matni
Keti Kapampangan e ya malumpawi;
At alang sangkan ban lunto talangkibi
Ngening patatagan ta’yang lalung bili.
Kapamilatan ning lugud a masapsap
Ding makatua ampon bayung Talasulat,
A misasanmetung king gintung pamalak
Ban migit king sadia lalu yang milablab
Ing Salitang iti a e tamu dapat
Pabusten kabud na ken matda at sukat.
At keta akmulan ding Sabing banyaga
Ampon aliwa pang e ta’ kasalita;
Inia nung e tamu kimut ban asagka
Ing bage yan pihung bukas o makadua,
Mapanat neng lubus ing manang Salita
Pasari namu ning linto tang’ pabaya.
Inia nung ngana ning Bayani ning Tibuan:
“Ing alang pakamal king salitang menan,
Kabas ne’t kapara ing malansang asan”;
Nanu pata, itang tune Kapampangan,
Uling atin tamu a Salitang menan,
Iti, ya kabud ing amanwan nang Rizal.
A sukat sesian na king danggut nang dila
Ning taung malugud sisuan na kang Inda;
Inia nung ing iti menan nang Salita
Ning meto’ lelangan, sukat yang isumpa
Nung paimburisan ne at pabusten matda
Ing Sabing kang Indu menan tang’ mistula.
Balayan kung tibuan, Indung Kapampangan,
Yatna mu ne Indu ing mamu mung kanuan,
Ngening ding anak mu ta’no mitambayan
King ikasulung mu’t malagung tagimpan;
A magmalasakit miuman palabungan
Ing Sabing e sukat matda kapilan man!
