PASIBAYU keng paratang a alalang pambarangay
miyaliwa nang diskarti ing kekatang atangalan
e mu karing kandidatu kareng baryu manuknangan
nune maging ding galame ning konseho munisipal
Ding alkalde at konsehal a miyembru na ning konsehu
mumuna nong dili reti a makikigulu-gulu;
Uling ding aliwa karing tatagal a kandidatu
ila mismung menamuyut, susuportang todu-todu.
At maging ding mengabigu king alalan a milabas
a e lubus mengalingwan ketang denasan dang kaplas,
O reta pang lito-lito e sasawang maki-alkas
mangampanya para karing taung karelang libutad
Ing nasa ra ban kanita magpasikan la mung pwersa
agamit da king tutuking ila namang mangampanya;
Alalan mung pambarangay bubugnus do ding pera da
ban saliwan dala botu ding balu rang e karela
Ing makanian a diskarti maralas tamung akakit
karing taung makisoso mangasyas a balangidngid,
Liyus ketang mantabe la pikakawani rong pilit
ding prinsipyung dapat sana a miyaptas king matulid
At ing metung pang masulit keng alalan a pambaryu
itang kamag-anak system a mitsa na ning kalbaryu,
Ding ditak a kamag-anak a mangayap a prinsipyu
dapot ela mikakalma para makapag-serbisyu
Ing alalang pambarangay nung isipan yang banayad
ya ing peka-maulagang ukdu na ning pamanyalak
Karing tapat manungkulan uling ila ding lumingap
king karelang ka-barangay a talaga namang dapat
Sanakan lang masalese ding marapat tangkilikan
basi king pangatau ra, king ugali at kagiwan
Agyang kamag-anak me pa’t matalik a kaluguran
e me dapat bubotu nung palage mu alang gawan
Lalu ding mag asu-asu a makasorang akakit
nung ninu ding makapuwestu karin la ngan magtilalid,
Ila retang kukuwerdasan, madidikta mu pamisip
alang sariling disisyun at e makapagmatulid
Maging detang manungkulan a tatagal pasibayu
sanakan lang masalese ding kailangan pang ibotu
Uling ding menasa karen menenaya la mung sweldu
alang nanu mang depatan a nebangnan na ning baryu
Pati na retang sugarul at sabungerung mamaltuk
a magnasang magserbisyu, e la dapat milulukluk;
Pablasang e mo akapkap ustung atin nang sigalut
neng pane lang mapupuyat, patingapun mung matudtud
Nung nu’ mayayakit karing dakal a meki-alkas mu,
e para magserbisyu ken ing kapagnasan dang tutu;
Nune kabud sinambut la, bisa ka’t e bisa rugu,
magsueldu la bulan-bulan agyang mamusbus lang bangku.
Nanupata nung tuliran anti lang mag-aplay obra
ding keraklan a magnasang manungkulan keni’t keta;
A nung akwa rang mikalma, mikakapanintunan la,
At e bitasa mang kimut datang yang pihu ing pera!
Ninung dapat manungkulan a Kapitan at Kagawad
nune ding e mangabiran king pamipatupad batas;
Detang taung ating belwan king obra e mapagpalat,
miye dangalan king barangay karas na ning aldo bukas….
Vhelle V. Garcia
September 29, 2013
Abu Dhabi, United Arab Emirates
