ALANG MATSURA keng pamaninum alak
Uling yan king tau natural na mekad,
Pero nung sobra na… king pelalung mayap
A tau, mamungang maragul a pintas.
Ding biasa, parating mapili lang bina
King nanu mang bage yapse na ning dila,
Inia nung kpilan la reti tutukba
Karin la maingat bubugnus salita.
At uling madalas impun na at sepu
Ning alak, ing maling impresyun ding tau,
E ta’na makitua nung waman ing palsu
Yang keta madalas pipilit dang ustu.
Inia agiang e mu ayakmul nung misan
Ing nanu mang bage a e karampatan,
Metung mu ing sukat a pakatandanan
Ban e ka milisya king tamak a dalan.
Nung kaya ala kang asabing matinu
Mapang e palak ing pabusten mu niamu;
Uling magkang magkamali ka pang sapu,
Maging mitsa na ning pamituang e tutu.
Kasi nung parehu na kong’ magalasgas
At ala nang kontrol keng pamipakibat,
Iti pihung alang kamaulian mayap
Pasari namu ning e ko’ mipalabas.
Pablasang ing alak, kasebian pin kabud,
Ya keng atian dapat diretsung papalub,
Uling kabud iti king utak tinaglus,
Madisakaril ya ing pelalu katunud.
Inia para kaku ban e mipasobra
Inum ing ninu mang e biasang magdala,
Ala nang muna keng pakalalale ya,
At e uling libri… pane ing tage na!
