Home Opinion Guino, mamiru ku mu pu!

Guino, mamiru ku mu pu!

220
0
SHARE

Nung ating asawang sobra king kaigpit,
ala nang mipante king kanakung misis;
Yan mung lampas ku king oras alas sais
neng ibat ku rugung migtindang tamalis

Midadapitun na ing kutang na kaku
nung kenu ku minta ot meyatrasu ku;
“Kagalang delanan me pa’ing babai mu,
‘nya e ka minuling agad?,” ngana kaku.

At nung nanu-nanung kaku na bibintang
lalu’t ing tinda ku e’ku apagisan;
Pati na ing ‘brief’ ku agad neng babawan
potang akit na kung mapagal dinatang.

Pero pota namang maragul ku abli
ampon magdalang kung barbekyung kamuti,
Asus, masaya ya at pane yang mayli
at saka agad na’nang mandilu niti.

Katakup ning silim agad neng managkat
matudtud king ba’ke kanung e mapuyat;
Misan, e la pa man matudtud ding anak
samal ne king kaku sisitsit ning berat.

At nandin pin uling sobra ku kapagal
king kakung panindng menanap, megisan
Ngening yagkat na kung magtumun-tumunan,
intasang anti kung sagin a pitimban?

Nanan ku mang ikondisyun ing sarili
ban aibie ku ing pamitan na niti,
Ot e mamatig man ing dipa’ning alti
a kakambal ning bie kung bilang lalaki?

“Catu” ngana kaku, “manyabi kang tutu
At nung ali pihu kang mapalu-palu!”
“E wari migtinda kung tamalis rugu?”
“Sumpa ka ing ika, manyabi kang tutu!”

“Dios ku naman Barang manyabi kung tapat,
At e ku maglaram keka agiang ditak;”
(Menuldul at biglang ginulis ing kildap)
“Guinu ko!… mamiru ku mu pu, patawad!”

Inia ika kuyug, nung kaugali ne
ning kakung misis ing kalangkap mu king bie,
Sakali arakap na kang ating abe,
ing Guinu, e me keng sumpa mu pakiabe.

Antining agpang mu naman king balu ku,
a matuang kasebian – sariling e tamu
sukat gawan saksi king dapat a palsu,
(ing Karin) uling e makibiru’ing Guinu!

LEAVE A REPLY

Please enter your comment!
Please enter your name here