Sa diumano ay talamak na ‘case fixing’
Na nangyayari sa ‘justice system’ natin
Ay naalarma ang marami sa atin.
Partikular na ang mayrung nakabimbing
Asunto sa Korte na kung saan mandin
Ang kalaban nito sa kanyang usapin
Ay mayaman at ang gusto’y kayang bilhin.
Kasi kung totoong yan ay nagaganap
Sa DOJ o sa alin pa mang antas
Ng Court of Justice dito sa Pilipinas,
Ano pang silbi ng ating mga batas?
Na nilikha upang siyang maging sandigan
Ng makatao at patas na katuwiran,
Kung ya’y nabibili na ng mayayaman
At maimpluwensyang tao sa lipunan?
Ya’y matinding dagok para sa mahirap
Na ang ka-asunto nito ay mapilak
Kapag nagkataong ang Piskal o si Judge
Ay kabilang nitong mahilig tumanggap!
Matagal nang isyu ang naturang bagay
Na kung saan partikular na nga po r’yan
Ay kadalasan nang bago pa man mag-file
Ng complaint ang dukha, naka-timbre na yan;
Sa kung kanino mang Piskal maaaring
Ma-assign ang kaso, sabihin man nating
Ya’y magdaraan sa raffle na gagawin,
Bunsod nga po nitong rampant na ‘case fixing’!
O kung hindi man sa ganitong paraan
Karaniwang yan ay posibleng ‘makatay’,
Ito’y sa haba ng panahon po naman
Ng paglilitis sa kaso tatagalan!
At natural lang na walang itatagal
Ang walang madukot lagi sa lukbutan,
Hanggang sa hindi na nito makayanan
Ang sa husgado ay makadalo minsan;
Lalo’t sa panahong ito na ang bista
Ay di pupuede ‘yung laging walang kwarta;
Pagkat tama’t ikaw itong nagdimanda
At iyo ang Piskal ay kampante ka na.
Kasi nga, gaya n’yang itong ‘justice system’
Ay nareretoke at kayang plantsahin
Ng nakauungos at/o nasa poder,
Saan na ang dukha posibleng pulutin?
Kung ang timbangan ng matuwid at tama
Ay nabibili na at nasasalaula
Sa kamay ng ilang ngayo’y naglipana
Nating mga Fixcals at Huwes na masiba?
Gaya na lang nitong isyu ng lagayan
Hinggil sa Alabang Boys at ilang Piskal,
Yan sa ganang amin ay di simpleng bagay
Na basta na lamang natin hahayaan.
Kaya, kung kami ang inyong tatanungin
Hinggil sa isyung yan ng ‘rampant case fixing,’
Ang tanging maire-rekomenda namin:
Ang mahuli’y patiwarik na ibitin!