1.
Deyu da ne pala ing hump king tulid ning California
uling agpang king balita lima no ring medisgrasya
palako na no pala ning DILG kanita pa
uling sobra ra karakal detang humps a pengabit da
e la mekiramdam agad ketang utus da karela
detang taung responsabli ban deti idayu ra la
2.
Nung alang maaksidenti a mengabakbak a intud
king sasabian ding memalen ing kapitan e pa kimut
lugud na ning Mayupaya alang mebalbal a buntuk
karing sinemplang king motor a sinigpo king malaut
nung mitagun atin mete at ketang dalan mirukduk
mekad mipatan ing sisi kang barangay Captain Bertuk
3.
Bayu makapangabit humps kailangan pa ing permisu
ampo pa ing ordinansa a apruban ning LGU
uling atin lang sukad den, kaba katas at disenyu
reflectorized a pintura a akit ding magmanehu
ing katas na kanu dapat 100 yang milimetru
at 4.3 meters neman kaba itang panga-arku
4.
Balu ra naman ding tau’ing kapagnasan nang kapitan
ketang pamangabit nang humps para ya king kaligtasan
da ring anggang motorista a king baryu ra daralan
antimurin para karing taung maglakad king dalan
dapot ding humps a kena ra milalu la king karakal
kapitna la pang megawa’t e la yari ring kabangal
5.
Detang kebit dang adwang humps ketang dalan a pakorba
ustu la mu ban kanita ring lalabas magminor la
uling kabangal la pamu ding adwang humps a kebit da
ketang patag siglulu lang lalabas ding motorista
ding aliwang magmanehu maralas kung apupuna
mipangwa lang dalan inia mamitamit ing disgrasya
6.
Ding king tulid ning iskwela at malapit king bisitas
deta ala lang prublema uling malwat no retang humps
dapot karing magmanehu dakal no ring makayalak
makasirut na la bakal at kailangan nong masamas
uling magkang ring dugang da rening saken a lalabas
ustung apalaris do ren akwa rang mangabitawak
7.
Sana ring humps king puruk dos idayu da nala naman
ampo pa sana ring sakeng pakaparada king dalan
tutal ating speed limit a pairal ning barangay
inia e no kailangan pa ding humps a sobra karakal
ban kanita dening drayber papulai lang mabagal
ding labag king speed limit kekayu la ngang pandakpan
