Ding atlung lamaran

    231
    0
    SHARE

    Misan ating atlung lalaking merakap
    Kilub ning palengki, menako lang prutas;
    King ba’rong bandalan king sala rang depat
    Ketang munisipyu diretsu rong’ agad.

    At karas da reti king istasyun pulis
    Disan de ing heping sobra king kabagsik;
    “Nanung kasu da ren” nganang migaligit,
    Pekibat ding tanud” menako la pu Tsip”.

    Kaibat nong’ pengutnan ding atlung lalaki,
    Inaus neng agad ing kayang Deputy;
    Tukyan yo’ ren nganang munta king palengki
    At ding penako ra idala yo’ keti.

    Ing minunang misyang karing mapangangas,
    Yapin ing menako karing sinigwelas;
    At ngana ning Hepi, “ban agad milabas
    Ing kekang pantalon keka yang ilukas”

    At kuma ka nganang metung a pirasu
    Karen a ngamu king palengki kinwa mu,
    King kekang pitaklan ipalub meng todu
    Absweltu na ka king kekang meging kasu.

    Kabang papalub ne ketang kayang buldit,
    Ining miparusan maybug neng manangis;
    Mipawas ya kanwan at mangapangisngis
    King penandaman nang e bibirung sakit.

    Kaibat mipatupad ing meging parusa
    Pepaulyan na ne ning hepi karela;
    Kalwal na king pasbul nitang opisina
    Atyu na la naman detang kayabe na.

    Ing kaduang lalaki ya namang meyaus
    King kuartu ning Hepi malagwang linub;
    Timpak ne lamesa darala nang suput
    At magugumasid karing pakalukluk.

    “Nanu no’mang prutas ding kekang darala?”
    Ngana niting Hepi a mengutang kaya,
    “Santul la pu” nganing agag pekibat na;
    “Aru!” nganang Hepi, “karagul da pala?”

    Nung makanian abe daklut na kang metung
    Karing amanwan mung penako mung santul,
    At ilako mu ne ing kekang pantalun
    Ba’na kang milabas king binye ming atul.

    “Nanu pung gawan ku?” ing agad nang kitang
    “Kanining santul a kanakung tatalnan?”
    “Ipalub me” ngana, “king kekang pitaklan
    Ing metung kareti bilang kaparusan”

    Anyang idampi ne king kayang kuyukut
    Ban king pitaklan na ume nang ipalub,
    Sinagakgak ya pa’t saka atuk-atuk
    Mayling anti waring e maybug mapupus.

    “Nanu ing kaylian mu?” nganing Hepi kaya,
    “Obat balamu yang makaloko keka?
    Ing abe mung metung a kakung perusa
    Maybug yang mabungsul at digsu merusmya.

    Samantalang ika akakwa mung mayli
    Kening kaparusan a keka binye mi?”
    “O makananu pu”, pekibat na niti
    “Aganaka ke pu ing abe ming tawli”

    “At bakit naman mo yang kekang isipan
    Samantalang ika ing keni makasyang?,
    Sarili mu namu ing kekang ganakan”
    Nganing Heping kening makasyang parusan.

    “O makananu po” nganang migmatulid,
    “Talagang e ku pin pu lubus aisip
    Nung makananu neng isaksak king buldit
    Itang penako nang langkang Catanduanis!!”

    Vhelle V. Garcia
    Abu Dhabi, United Emirates

    LEAVE A REPLY

    Please enter your comment!
    Please enter your name here