Kanitang dintang la king kekatang bansa
king isla ning Mactan deti nang kastila
ding rajah at datu ela migpabusta
at e mikakanu ume sinagupa
Datu lapu-lapu king bista’t balu nang
e tamu sumambut magwanta king laban
kontra karing baril ding sibat da’t palang
mekipamuk la rin anggang kamatayan
King kasalesayan ning pamakipamuk
saul tamu batu ala tamung panud
nung inia malambat linto ‘tang busabus
king gamat ding daywan a keti sinakup
Maging n’yang datang la; ding amerikanu
a metung mu naman karing menabusu
ela pepatugut deting Pilipinu
king pamaglualu king balayan tamu
At ing pekatawli itang bansang japan
iniang panaun ning kadwang gyera mundial
dakal la kanita ding bie mengasintang
king pangasaldak ning depensa Bataan
Nung balikdan tamu ing anggang milabas
kabud mu tapang ing kekatang pangangas
wa’ man king labanan e tamu mamatras
E ta maguanta neng maina ta’ armas
At king kilub na ning makabang panaun
anting king milyari e ta mika-liksyun
at angga man eni e ta pa sinulung
king aspetu na ning depensa ning nasyun
Ining bansang Tsina nung atin yang takut
King west Philippine sea e mangangas lungub
Scarborough shoal o bajo de masinluc
Angkaminan na ne agiang e ne sakup
Ing metung a bansang matibe depensa
pitatakutan de king tagle ng pwersa
anti mo ing Frances, Roma at Italya
Aleman at ining dakilang Britanya
Kanitang atyu la ding basi militar
ding amerikanu king kekatang lugal
alang ninu pa man ing mengangas myuman
a anti king tsina a tutung lamiran
Pablasang balu na nung nanung malyari
nung magkapilit ya misagkul yang pilmi
inia e sumubuk ume dumiskarti
at makisamsaman karing ena bandi
Dapot eni awyan maniamantala ya
buri nang samsaman ing e naman kaya
at ban managumpe king pakikwanan na
palage ta kaya e gumamit pwersa?
Sakaling ing Tsina keti ya lumusub
ining bangsa tamu e kaya marunut?
king pamakidigma ta nu ta sumambut
nung ding gamit tamu masyadu lang dimut
Eke mamalatyan ing kekatang balen
nun e ding kanita migpabayang lider
nung peulagan da at kinimut la ren
ing depansa tamu e sa mipaburen !!!!
