Home Opinion ‘BBM-Inday Sara tandem,’ ing pihung sumambut ken!

‘BBM-Inday Sara tandem,’ ing pihung sumambut ken!

342
0
SHARE

KENG pamisanib dang puwersa rening apat
a partidung pawang kumpletu king sukat
isadya nung wari keng pamakilamas
keng mapaling gyera, kumpletu la armas.

Makinarya, kualta, suporta ning masa,
kasingkilan ampon maluat nang kasangga;
bukud king dakal la ring makakilala
at batukan na la ren keng pulitika.

Nung atin mang karen, nung wari keng lara
ing tagle nang paras e na mañget dila,
den marakal-dakal la pa murin akua
a makaragdag king saup ding aliwa.

Ini pa’mong “Bongbong-Inday Sara tandem”
ing e mangibabo king insa’mang ‘survey’
umpisa Pang-ulo anggang Mauli ken,
ing e ta’ apihu ing panyambut da ren?

Inya ngeni pa mu ken asabi tamu
ing magpang-adua pin mekad ining Isko;
Lacson at Leni ring milutlutan ustu
king katlu at kapat; i Paquiao ultimu.

At dening aliwa pang mekiki-alkas
mapalyaring ating lungub keng pang-apat,
pang-lima o kaya e bitasang mangat
ding keni e ku na inabe sinulat.

‘Landslide’ pihu ken ing maging resulta
ning eleksyon pabor kang Bongbong at Sara,
inyasa’t mayapang mamag- ‘back out’ na la
ding keng pekamatas a ‘seat’ ing target da.

Uli ning den pihung ala lang panyambut
agyang nanan deting paypagal kumayud;
Inya ban e na’la magal at migastus,
ing murung keng laban yang peka-makatud.

E anting insultu kening pikabaluan
tamung keng boksing ya mikualta, mirangal
iting pagnasan na rugung pakirasan,
yan e makakua keng ehersisyong dakal.

Ing maging pamuntuk ning metung a bansa,
yan keng ‘shadow boxing’ e rugu makakua;
at ken ing anti ku namang ababasa,
malamang lunto yang pikaylian ding sabla.

Asne kasikan lub magsalitang English,
bista’t king sabing yan i Manny e tais;
At agyang Tagalug ing yapse ning diaskis
menasa, yan e na malino asambit.

At saka, antimong pamuntuk ning bansa,
ya makananu yang makipagsalita
karing opisyal da ring ken miayaliwa
a pamuntuk ampon sugo alimbawa?

Neng deti atin lang pang-mabilug yatu
a kapulungan king Russia, makananu
yang makisingkilan pago karing Ruso
nung maski ‘Taglish’ mu e na adiretsu?

Inya mas e palak mig- ‘reelect’ nya ken
i Paquiao antimong senador king ba neng
mibastag ustu keng e ra alakuan deng
anti keyang ‘can count only 1 up to 10?

LEAVE A REPLY

Please enter your comment!
Please enter your name here