Ang pulis, sa mata ng batang paslit

    130
    0
    SHARE

    Minsan, nagkasabay magsimba sa Quiapo
    ang isang pulis at isang batang ngongo;
    Dasal nitong bata ay “Loyd pahini po
    nan peya” aniya habang nakatungo.

    “Itan naan pito paya makabiyi
    nan tinelat” aniya, “niyan ta payengki”;
    Dinig nitong pulis ang kanyang sinabi,
    at naintindian ang hiling ng pobre.

    Nagdalang habag sa tinuran ng bata
    itong pulis, kaya’t sa laki ng awa
    ay sa bulsa nito dumukot ng kusa
    ng pera upang ang bata ay bigyan nga.

    Subalit otsenta pesos na lang pala
    ang pera ng pulis sa kanyang pitaka,
    kaya ito lang ang naiabot niya
    sa batang ni hindi yata niya kilala.

    At pinagpatuloy ng nasabing pulis
    ang taos sa puso nitong pakikinig
    sa banal na misa – at kanyang narinig
    mula sa labi mismo ng batang paslit

    Ang pangungusap na: “Niot ko ta tutunod
    wag na pong ta pulit n’yo tana iabot;
    Kati binawatan niya nan bente petot,
    an hinhini ko na wan anded petot”.
     
    Sa narinig, napa-antanda ang pulis
    at walang nagawa kundi ang umalis;
    Nakatulong na’t lahat sa batang paslit,
    pinaghinalaan pa siyang nangupit?

    Dala palibhasa nitong karamihan
    sa mga pulis ay sangkot kadalasan
    sa kung anu-ano r’yang kabulastugan,
    kaya pati bata’y lubos nakagisnan

    Ang ilang bagay na di dapat ikapit
    sa katauhan ng ating mga pulis;
    At kung saan pati na rin mababait
    damay palagi sa di kanais-nais

    Na gawain ng ating ‘men in uniform’,
    na imbes sila nga ang tagapagtanggol
    ng masa laban sa krimen – sila itong
    kadalasan sangkot d’yan sa pangongotong

    At iba’t-iba pang katarantaduhan,
    na di dapat gawin bilang ‘public servant’;
    Pero kung alin ang otoridad bilang
    ay sila ang salot sa ating lipunan.

    Na pugad din naman ng nakararaming
    pulitikong walang ginawang magaling,
    Kundi magpasarap habang ang tungkuling
    dapat gampanan ay halos hindi pansin.

    O sadyang likas na sa ating kultura
    ang ganito kaya nakamulatan na,
    pati nitong mga may murang isip pa,
    na basta’t pulis ay ganyan na kumbaga?

    (At kung ano ang nakikita ng bata
    na ginagawa riyan ng nakatatanda
    ay siyang ginagaya – sa pag-aakala
    na ito ang wasto at talagang tama?)

    LEAVE A REPLY

    Please enter your comment!
    Please enter your name here