a nu’i Boking at ining Pyra Lucas,
den milaban la niang eleksyung milabas
at e tinuktuk mang balandra ing gagad
Uli ning kapat mang dake ring ikua na
ning Mayor e na la atumbasan Pyra,
inya king ambisyun nang mag-Alkalde ya
balamu menugse yang dakal a pera.
(Keng lawe ku, maninap yang makagising
ing makapakuldas keng puestu kang Boking;
Angga’t ing ‘3rd term’ na keng ‘year 2019
as City Dad’ e pa masambut marahil).
Inia uli na nian at ning kapagnasan
niting alasak ne i Boking, e tuknang
keng keyang intensyun a mamikatsa yang
e tutung istoria ba’niang pakisiran?
At uling pati na mabilug Konsehu
inabe nang Lucas king keyang reklamu,
ing ya penekasan de pin yata kanu,
delum deng ‘perjury’ iti king husgadu.
Karaniwan na yan kareng masasambut
ing nanu-nanu la gagawan palusut,
king balang e lunto maina’t saka alus
alang memagbotu at tapat sinaup.
Iti, kanya-kanya nang ‘alibi’ misan,
ban makapagbangun puri ing talunan;
At bina kalaut king tune katutuan
ing asna kababo reting kasangkanan.
Antimo pin ngeni king bili nang Lucas,
a pepalual na ing matsurang pahayag,
inggil king pati ken yatang illegal drugs,
sasandalian ne ing Mayor Mabalacat?
At nung inya mekad i Boking Morales
king bage mesabi ikua nang misabit
a lagyu uli ning ngara king ‘master list’
ding protectors atyu, malino meyakit?
At ditsu namu pin kesira na lagyu
ing ya king bage e na kabalu-balu
bigla mi’broadcast keng TV ing e tutu,
a posibli niting ikasukul rugu!
E mayan a bage ing mipagbintangan
yang sangkut i Boking king antimo kanian,
pablasang tau yang malinis, marangal
at talagang tapat keng pamanungkulan.
Nung e ya mayap a tau ining Boking
makananu niting apapanatiling
ing ya Mabalacat yalal de pa murin
waman e mekalima neng terminu karin?
At ya angga man pin ngening salukuyan
mabanglu ya lagyu at katatalakaran;
subali king iti subuk ne tetagan
karas keng responsableng pamanungkulan.
Puera pa king ngana ping Gob ‘Nanay Babay’
keng ‘illegal drugs’ ala kanung sangkut keti
karing lokal tamung opisyales pati,
partikular karing kekatangAlkalde.
Nung inia keng puntung iti nung tuliran,
ing amanung gingkas ning Punlalawigan
king Kingsborough ketang mierkoles a miralan
karing keti alang sangkut metung mu man!
