(Kaugne ning metung a ordinansa a mipatupad inyang i Among Ed Panlilio ya ing Gobernador, at nung nu’ agpang kaniti, makailangan bina ing agyang pamisan-misan mu man papalual tamung artikulung milimbag king salitang Capampangan, iting makatuki pamung buri nang idake ning maluka yung talasuyu para king malugud yung pamamasa mal kung kalalawigan a makimasabal kekatang sariling Amanung Sisuan).
PITU NA lang banua keng pamiyabe ra
Di Kanor at Maring bilang miasawa,
Dapot kinagli o kaya memita ya
Kang Kanor i Maring, bistasang aliya.
A mangabaldugan balamu malabug,
King i Maring atin ya pang tsansang mugtut,
Inya ining Kanor aisip na kabud
Ing ken king Obando, king Birhen dumurup.
Sibukan dang keni tinerak, kuraldal
Ampon samba’t siklod arap na ning altar,
Dapot angga na king miras atlung bulan
Ing keni pake ra alang kalinawan.
Ing pemangawa ra mialiwa nang bage,
Ating pasalungat at ating pabakle;
Maki-tumbang presu ampon patalete,
Dapot eria’palto ing maging pangane.
Makanyan man agyang gastus mu at pagal,
Ining Kanor e ya bigu kapanayan
King ining misis na isitsit na misan
Keya, ing iti pin ikua nang milamnan.
Inya ketang Lunes, apiyagkatan da
Ing munta king doktor banting magkonsulta;
Sinuri nong ustu… at nyang magbalik la,
Sabi na ning doktor adwa ing resulta.
Masanting ya ngana’ing metung a balita
Dapot matsura ya ngana ining kadwa;
Ing masanting ya na ing pinili ra pa…
Ngana king babai: “Dapat kang magsaya.
Mag-atlu neng bulan misis ing bugtut mu,
Basi king ‘frog test’ a maingat gewa ku ”;
Panamdam ding adwa mikaul lang ustu,
At nganing mister a sobra kakusuelu:
“Nung lalaki ya yan kaku te’ palagyu
Ban kanita kaku ya mamuling lalu”;
At nganing misis a biglang miparuku:
“Nung yan ing buri mu, ikang bala rugu”.
Palual no king pasbul inyang magbuelta ya
I mister, at ngana: “O itang matsura,
E ye pa sinabi… nanu ya pu pala?”
“Meyakit ing ala kang mabie semilya!”
