A big applause for Justice Sec De Lima

    359
    0
    SHARE

    Tama lang at sadyang marapat talaga
    Na ipatigil ang napakataas na
    Singilin sa Korte o tinatawag na
    Legal fees at saka ibang bayarin pa

    Bago ang sinuman ay makapag-habla
    Sa ‘bar of justice’ ng ating Republika,
    Na kung saan lubhang grabe na kumbaga
    Ang singiling dapat bayaran sa tuwina

    Bago ang gaya na ating idinulog
    Sa Hukuman upang ang lupang sinakop
    Ng iba, at para mabawi mong lubos,
    Ay kinakailangan pa manding gumastos

    Tulad halimbawa na lang ni ‘yours truly’
    Na napilitan ngang iakyat sa Korte
    Ang kasong bagama’t hindi lubhang grabe,
    Pero may himig na mang pananalbahe

    Kasi nga ay kusa talagang binakod
    Na aking karatig ‘lot owner’ ang sakop
    Ng aking property nang walang pahintulot,
    Kaya heto ngayon ako’y nagkagastos
     
    Ng di lang pambayad sa kinuhang counsel
    Na siyang hahawak sa aking usapin,
    Kundi may ‘filing fee’ na dapat unahin
    Puera ang pambayad sa ‘series of hearing’

    At kung anu-ano pang idinadagdag
    Liban sa iba pa na aywan kung ya’y VAT,
    Na di rin naman gaanong maliwanag
    Kung para saan ang dagdag na pahirap

    Na kinokolekta mula sa complainant,
    Plaintiff , petitioner o nitong sinumang
    Nais magsampa ng kaso sa Hukuman
    Para makamit ang mithing katarungan

    Na kung saan tanging ang mga maykaya
    At maimpluwensya ang puedeng magsampa
    Ng kaso sa Korte, pagkat ang hustisya
    Para sa dukha ay mailap kumbaga?

    Sanhi na rin ng kalakaran sa Korte,
    Na ang may pambayad nga lang ng ‘legal fee’
    Ang may karapatan sa puntong nasabi,
    Kaya anong maasahan pa ng pobre?
     
    Para maidulog sa ating Husgado
    Ang ninanais na maisampang kaso?
    Kung kaya nga’t tapak-tapakan man ito
    Ng mapera ay di makapagreklamo?

    Kaya bandang huli, kahit may katuwiran
    Ang isang dukha ay tameme na lang?
    Kundi man pag-alsa laban sa lipunan
    Nitong naghaharing uri ang hantungan?

    Dahilan na rin sa animo ay wala
    Ng sukat paglagyan ang maraming dukha,
    Sanhi ng ganitong batas sa ‘ting bansa
    Na tunay naman ding hindi patas yata?

    Kailan pa posibleng magka -‘room for justice’
    Itong kapos-palad nating anak-pawis,
    Kung ni pambayad ng naturang ‘legal fees’
    Para kasuhan ang sa kanya’y nanakit

    Ay wala nga siyang makapa ni kusing
    Sa kanyang lukbutan para sa hangaring
    Makapag- ‘file’ man lang ng kaso sa ating
    Bar of Justice upang mabigyan ng pansin?

    Kaya tama lang si Justice Sec De Lima
    Sa ipinag-utos nitong itigil na
    Itong pagsingil ng napakataas na
    Legal fee sa Korte para magkatsansa

    Itong mahihirap na ipagsanggalang
    Ang tama at legal nilang karapatan
    Laban sa sinumang mapagsamantalang
    Mga maykaya sa bulok na lipunan!!!

    LEAVE A REPLY

    Please enter your comment!
    Please enter your name here