Karing mapilan a kakung kasikretu
metung ne karen i Buroy a pinsan ku
maselan mang bage apagtiwala mu
at palage ku lub a keya manguwentu
Nanu man ing lihim a kanakung sabyan
king pinsan kung iti eku mikelangan
at makapihu ku ing ena panyabyan
uling e mahilig makipagdaldalan
Pablasang ngongu ya nung inia maralas
ere man sikasu’t pag-ukulan oras;
mapad deng buysitan detang pilyung anak
uli ning ngusu nang bangal king libutad
Pauli na pin ning keyang kapansanan
e ya mamaglabit maging kaninu man
at ing pamaglolo e na pengangasan
neng e makadiga ,lubus nang kelingwan
Misan ati kami king kubu marangle
sinabi na kaku pangarap na king bie;
Sinawa ne kanung makipalut pale
uling e masensu angga king tumwa ne
Mapilan mung aldo kakung abalitan
minta ya Menila ing kanakung pinsan
bigla yang mebating alang kapamunan
uli ning paninap a keyang pagnasan
Ing apulung banwa mabilis sinikad
dakal nang megbayu at bage meganap;
minsang sasaken ke ing kakung damulag
digsu naku bingga ning kotsing linabas
at uli ning iti eke kakilala
tekikyan keng lawe kabang palaut ya;
Gulpi yang mibalik, aplit bubusina
king mismung tulid ku karin migparada
Misdan ku niang akit ke ing drayber niti,
I buroy pala ing magdala king kotsi;
Ing pali kung buntuk kabud ikt ke iti
mipalitan tula, masagad a ayli
Keka ya kotsi yan ing agad kung kitang,
tinangu yang bagya saka ya tiniman;
Ing metung pang bage kakung apansinan
itang keyang ngusu, ngeni ene bangal
Nanung aluban mung obra king Menila?
melare ka kutis, meputi, metaba;
“Nung amyan ngu ngenga enga maniwana”
(nung sabyan ku keka eka maniwala)
maanting ngu omla, minuelti ngu magya
(masanting ku obra, misuerti kung bagya )
Mipaintagun ngana kanitang luslus ku
atin kung sinopan a mebanggang tau;
King kayang kumpanya midinan kung pwestu
bilang opereytor karing teleponu
Buroy ngaku kaya emuku paglokwan
eku makibiru at makibolangan;
impusibli ngakung king kekang kabilyan
ibye da ing obra a tutung maselan
“Nunu ngaman yugu ing ngangung inami
(Tutu naman rugu ing kakung sinabi)
omeneytol ngu min ngenang mielniti”
(opereytor ku pin ketang PLDT)
“neng misi ya’in ninya manwid a nabi”
(neng busy ya’ing linya- matulid a sabi)
“ngalin mangangamit ing monis ngung ini”
(karin magagamit ing bosis kung ini)
“Itang awling ili ya ing ngangung mosis
(Itang tawling dili ya ing kakung bosis)
ngayali meng nimnam inang nge nat mi nits”
(kayari meng dimdam itang “cannot be reached)
E wari ngana pang kaku migmatulid:
“NGOO NGOO NGOO ing nawng eni mangangamit
(NGOOO NGOO NGOO ing sound keti magagamit)
angu ina nginsan enga mangipinit
(aku ita insan eka makipilit)
Vhelle V. Garcia
March 18, 2012
Abu Dhabi, United Arab Emirates
