Dening kongresista a biglang ginulyak
at ing Resolusyon nasa reng itulak
king ban ipatuknang ing pamipalabas
karing pelikulang lalto lang marawak
Lalu na keng temang ilang maging lider
at maki-konensyon karetang ‘drug dealer’,
Antimurin naman keng ‘prostitution den’
ampon miayaliwang matsurang karakter
At alus keraklan karing pelikula
ila ring parating lalto kontrabida;
Purus katiwalian, at pawang matsura
ing pane rang papil bilang Kongresista.
Atin lang matulid nung kekatang suryan
lalu na karetang tapat manungkulan
uling mitatak king isip ding keraklan,
basta pulitiku matsura panyaptan.
Pero nanu naman ing maging epektu
sakali ma’t ilang gewa rang ehemplu
karing pelikulang ayayalben tamu,
Obat ilang bukud atang magreklamu?
Malilyari naman talaga’ing makanyan
nu’man karing bansa keti king sikluban;
E la kongresista, gubernador, bokal
Nune pati na pa opisyal militar.
Ing nanu mang bage a gawang baluktut
dapat mung ipasyag at e sasalikut
ing posibilidad a keraklan sangkut
keng labag king batas, ila reti kabud.
At uling Katutuan ya ing magpalaya
king balen, keng panga-gapus tanikala,
Ing e na ayapse nung misan ning dila
mikaka-bosis keng antiting pikudta.
Nung ala kang sugat e ka manasakit
atsanan da ka mang asin a dinikdik;
Dapot nung metung ka karing mapipitik
pibatan mu namu kirut a lilitik.
Pero obat nanung karelang gagaga
nung waman ila ring menasa ing paksa?
Ing tutu dapat da pa ping ikatula
Ban ing kamulatan lumabung pang bina!
Kasebyan nung ninung munang migpalpatuk
ya ngarang mengebun nung wari king manuk;
Inya keng biling yan ala na pin kabud
mituran nune ring ating sasalikut!
Nanu mang adyenda lalto pikatulan
nung alang binatbat e mu ne papalwal,
Uling lunto na kang pulitikong mangmang
a’yalang aisip a gawang marangal
Ing dapat midinan pansin at ulaga
aliwa ing tungkul kaniang pulitika
nune ing alang patna’t pane pangatas na
presyu ning krudu ken ampon gasolina.
At megawang batas tungkul kaniang laru
a ‘de-regulated’ at abusung tutu
karing memalen a parati nang bigu
at king kasakitan daraya na pusu.
Nung ita ing bage dakayanan isip
magkang ding kabalen uman daka bitis;
Oneng pelikula do’ ring mangakisig
a ACTION STAR ding ikwa mung asilip!!!
Vhelle V. Garcia
February 25, 2012
Abu Dhabi, United Arab Emirates
