Ining pikatsa mu a laman ning kwentu
a ipalage ra keng TV, a nung nu’
lalarawan nyan ing tutu kekatamu,
yan malilyari na mabilug a yatu.
At nung nu’ insanu ring pulis ding sukat
a talapaglualu laban king e mayap
ampo aliwa pang pamirapat-dapat
intasang ila ring menasa lalabag.
At pasimuno keng mialiwa pang bage
a sukat da reting lisyan, pikarine;
Oneng ali, kase ila ring ken pane
gulut na ning Telon ding bante-salake.
Iting ‘Tele-movie’ a mipamansagan
‘The BLACK RIDER’ ila ring mabie larawan
ning napun at ngeni mismu rening aduang
tapuk a ing metung keng mayap mamaltang.
Kabang ining kadua kualta mu ing angad
a malalagua nang asakmal king gamat
at mie e bitasa mang tinulu pawas
kabang lilisyan ne upaya ing batas.
At ining mesabing serye pin keng TV,
adua mung bage ing kapupuntan niti;
Mipakayap o mipakarok pilmi?
At oyan, balamu pin ing malilyari!
Inyasa’t king kakung sariling opinion
ing serye keng TV den anti na la mung
Tuturu ring adua a nung makananung
dumiskarte king bie ing metung at metung.
Ken ta’ masasagsag a kapaniwalan
karing aduang tapuk king babie nang aral
ning mesabing serye a sukat apusan
ing ikakayap o ikaliling dalan?
Nung ing negatibu gawa ing asip
tularan ning anak, pihu yang manganib
a bie nung ding ‘Idol’ na niting ‘characters’
ila ring salbahe’t tarantadong pulis!
Antining nung ala lang ‘parental guidance’
King ining alben da e sukat tularan
nanu ing karela malyaring asahan
nu’ne miparoro king e ustung dalan?
Ngening ing karelang akakit keng TV,
pamaten da la ring bihag dang babai
a pamisali ra karing negosyante,
kaybat da la reting alasak a puri.
Ala kung ninu man ken pamaramdaman
a gagamal kualta keng bage anti yan,
pero sana e ta’king bage makanian
anting tutulak sablang kayanakan.
Makananu talang ayungyung king mayap
ding paslit pamu at mura pa pin utak,
ngeni ing akakit da umpisang abak
miayaliwang krimen at kriminalidad?
Ala nang migit ken a peka-epektibu
a pamamaralan, payul a mayubu,
karing alagad ning ‘peace & order’ tamu
nu’ne ing maging tapat la ren keng serbisyu!~
(Atin ya pang kasuglung)
