Nung pawang sukal lub at sari king salpak
Ing keka payalduk ning bugtung mung anak,
Yan king sarili mu sukat mung asanak
Ing ika makanian ka mu naman depat;
Kanitang nan’ daka mang yusuk king mayap
Pabalang pa misan ing kekang pakibat.
Madalas, king agiang balu mung e ustu
At malyaring ikasukal nining lub ku,
Alang pakundangan kusang gagawan mu
Para mu king kekang sariling kusuelu;
Inia naman ngening ikang king bili ku
Makanian mu naman ing sukli nang pihu.
Pablasang nung nanu ngara ring makatua
Ing pengan ning tau, ya ing ipalual na!
Inia nanu’t e pin ing depat mu keta
Ing e mu pupulan potang matua na ka?
Inten mung ding anak mu igalang da ka
Nung e mu gewa king sarili mung tata?
DISPU !
“Dispu”, nganing bosis
Malino dindam ku tukuran ning eran,
Nung nu’ ing lagyu na
Ning abe kung bale yang keta na ausan;
“Ninu yan?” ngana ning
Anting pekibat ku king migpaindispung yan,
Kagnan ning dapal kung
Tinikdo at layun tinando king awang;
“Aku pu y Tektek,
A bunsung anak nang kumara yung Kobang,
Papanamdam ya pung
Itin mi ima ku kang dara kung Minyang”
King agiang balu kung
Atlu nang gating ing abias mi king tukung,,
Binie ku ngan kaya,
Ketang oras a ita baling ating itun;
Uling aisip ku,
King bili rang itang ume nang dalumdum,
Nung atin lang pera,
Baket e la pamo minta kang Mang Anung?
Inia makanian kung
Inari king lub ing antiting kongklusyun,
King ila ala nong’
Aliwang pikuanan nu’la man lumuyun!
Paniang nang ibat
King palengking misis, ing agad nang kitang:
“Tinun na ka, abe?
Sanduk na ka” ngana, “magdala kung ulam”;
“Ali ku pa” ngaku,
“Kase ala ta’nang abias a mitagan”;
“Nano?” ngana niting
Mituklip a kile, mengulurut kanuan,
“E wari keng tukung
Atin pang sobra kung menese paugtuan?”
“Wa” ngaku, “atin pa
Dapot nandin ating dinatang menandam”
At kaibat antini
King malumeme at banayad a sabi,
King mal kung asawa
Inisplika ku nung nanu ing miliari;
“King agiang ya kabud
Abias ta’ king tukung peparam ku iti
Uling agiang kenu
Kata manutang ken dinan dakang pilmi;
Pero king bili ra,
Uli ning ala lang panaratus deti,
Ninu mo pin kaya
Ing pautang karen a magtinda keti?”
