Misan, kalalaman ning benging taimik
me-holdap ya’ing metung a pamasadang dyip
at uling mitagun, ing uran tikatik
karing checkpoint ala nang magbante pulis
Deng holdaper yan ing pagmalasadian da
ban mipanusigan dapat dang matsura;
Karas king ilang a lugal “para!” ngana
ning metung, at “holdap!” ngara ding abe na.
Pasensiya na co pu ngara ding holdaper
Karing pasaherus a kayangkas da ren
ibye yu la sa’ ring pera’t gamit yu ken
alang manasakit nganing peka-lider
Itang dalagita atyu dane gulut
ning drayber – mangalgal ya keng sobrang tacut;
abe ne’y apu nang panatag mu lukluk,
a mimidad manga otsenta’y dos anyus
Ding lamiran e la pa murin tinakas
agyang ikua ra no’ pera at alahas;
at ngana pa niting lider ding menoldap:
“ding anggang lalaki igapus yo gamat!”
At deting babai i-‘rape’ ta la ngan den
nganang mengmanu ning karelang lider
bayu ta la’y bulus ding ninu man karen
pasingon yo angin ding gulung ning saken
Bigla yang mengaga itang dalagita
at migmakalunus ketang pamuntuk da;
aku nang i-‘rape’ yu, ing panigapu na
e yu ne pakiabe i apu ku ngana.
Mimwa ya ing matwa king bigla nang dindam
king apu na, inia kindut ne singit yan;
patugut ca ngana e mu wari dimdam
itang sinabi rang i-‘rape’ daka ta ngan?!
Vhelle V. Garcia
