Pilan neng duminggung aldo-aldo lilibut
Manintun aluban obra ining Pisuk,
Angga king miras ya dane ning Macaluk
A nu’ na la disan ding aduang paratut.
Ken king munisipyu ning bantug a Mayor
A nu’ya magobra ing dyaskis a Pudong;
“Isan, sawpan mu ku king Administrator
Balita ku mananggapan yang Janitor”.
“Aru” ngana niti, “ala nang bakanti,
Aku, casual ku pa murin angga ngeni,
Mayapa yata kang Bhong ka makisabi
Uling ya ing peka-‘little mayor’ keti”.
Malagua’t salita menik ya i Pisuk,
At ikit ne y Bhong, panatag a lukluk
Susulat lele na nitang pasbul palub
King upisina ning mayor a malugud.
“Bhong” ngana pasaup ku sa’ rugu keka
King ba’kung makakit masanting a obra,
Balita – king Mayor yu masikanan ka
Inya makapihu kung makapag-obra”
“Agyang e kang Mayor atin kung aibie
Obra” ngana ning Bhong king sabing manene,
“Ay tuto?” ngana ning Pisuk, at saka ne
Kitnan yan, nung nanung obra nang a ibie.
“Simpli mu” ngana ning pilyong Bhong kang Pisuk,
“Ing ibie ku kabud ka mu makalukluk,
Manibat king abak – mimisip, luluruk,
Nung ninung pasueldu, akinse’t mapupus”!!!
(Aba, nung talagang ala kang aluban
Nanu man ping klasing ken kapanintunan,
Ot e ka mabisa kesa king ala kang
Unabis alaklak nung e pisapalan?
Senayan mu kasi keng danup e mate
Ing taung unabis e biasang dirine;
Antimo ing misan kakung akayabe
Dinalo king burul ning siping ming bale.
Uli ning dakal a klasing makayapag
A pamangan, ating lelut, saka sopas,
Apansinan ku ing pemulsa neng Kulas
Ing e karaniwan keng kematen yapag.
Antimo’ ing kamuti a makapanatut
Nung talagang ala kang alaklak kuyug
Den pekamasanting lang panulung danup
Nganing kasebian ding beluga keng bunduk.
Pero alang migit a pekamasanting
A opisyu nung e ing keng gubyernu pin,
Kabilang la ken ding ausan dang ‘Engineer’
Malaguang mikualta , kakatat mil de mil.
Ating kanaku ra sisitsit, karen mung
Mag-aprub ‘electric power’ o koneksyon
Ing asisikwat na kanu kareng bayung
Magpakabit linya – keng tantya ra milyons;
At metung pa agyang iti e ya lulub
Keng oras ngara ring keya mekasubuk,
Bista’t mesita ne king bayu pang lukluk
A mapuring mayor, e migbayu kimut?~
