ILUG yamung alang dinalan a metru
keng caba ing tete Sulipan cuyug cu,
miapsa ya ing ebon? “Imposibli” ngacu:
uling e man lampas keng pilan minutu.
Sisti mu, king iti ing pecamacaba
canu ngarang tete lual na ning Menila;
yan dinalan ya mang kilometru caba,
ebun ya mang tagac, iti e miyapsa.
Casebian mu pin ing inggil king bage iti
uli ning ‘Ebun’ a pagcamalian deti,
‘Ibon’ ya o ‘Ayup’ a susulapo’yti;
at ‘Bird’ ya keng English – ditman e magsilbi!
Sabing Capampangan, e ya dayalectu
nun’e lengguahe ya agpang cang apu cu,
ila ning tagalug ampo’ing Ilocano,
at saka yata ing Sabing Cebuano?
At anti na pin ning dacal lang mangutang
caring e mindatun keti Capampangan,
a e ra na la balu man cabaldugan
ding salitang ngara sobra king kalalam.
Inisplika ta’na king tikyan na niti
ding salitang e ra nala balu ngeni
ing caparehu ra cabaldugan deti
lalu ring malagad nang e mame keti.
E na la ditac ding sabing Capampangan
a e ra na lubus mang ken aintindian
ding Cabalen tamung keti bihira nang
muli o manapa ngening salucuyan.
Nung inia pati na ing cultura tamu,
literatura at Sisuan tang Amanu,
king danggut dila ring dacal kecatamu
a menaliwa nang pugad alanayu.
SALAMAT, at kening dyario a nu’ ku pin
susulat, timawa ing pacsang kecaming
king masa payabut, ing suporta na ning
‘publisher’ at talapanulip masanting.
Anti ning ila man buri reng masagip
ing Sabing nan’cu nang e matda king isip,
pasagiwan ta’ya keng gambul at dilig
ban e ya mapanat at maniuling aplit.
Nung nu’ otograpiang Castila ing balu
nang pigmulan den ning kecong talasuyu,
Ing salitang “queca” ‘qu’ ya ing deyu
ra king ‘Surian Wika,’ meging “keca” niamu.
At king otograpia nang Padre Ven Samson
a nu ing ‘c’ at ‘k’ den adua la pialung;
Ing catuki ren nung ‘vowel’ lang ‘a’ at ‘o’
ing ‘a’ maging ‘ca’ ya, ing ‘o’ magi yang ‘co’.
Kabang nung ‘e’ neman, iti maging ‘ce’ ya
o ‘ci’ nung ibigkas king dila, lulupa
king ‘kasi’ o ‘case’ uling tonung ‘s’ la,
at e ‘k,’ atyu ken ing pamialiwa ra.
Ing ‘u’ keng salitang “adua” ing pelit da
‘w’ nung inia ngeni antini ya:
“adwa” karing bayung keng literatura
a ituturu ra ken caring iskwela.
Ing “y” antimurin yang pelit da king “i”
at nung nu’ ing “sadia” yan “sadya” ne ngeni;
at ing “kualta,” meging “kwalta” ne pin, pati
na ing “palual,” ing ‘u’ “w” ne iti.
(Atin yang casuglung)
