Olongapo City sanitary landfill. Facebook photo
OLONGAPO CITY – Patay na ang isang scavenger nang matagpuan ito ng kapwa scavenger sa sanitary landfill sa Barangay New Cabalan sa lungsod na ito.
Kinilala ng pulisya ang biktimang si Teresita Aldas, 69, residente ng Purok 4, Liwanag Street, Barangay New Cabalan.
Ayon sa ulat, alas–10 ng umaga Lunes nang umalis ng bahay ang biktima patungo ng landfill para manguha ng pagkain para sa aso. Alas-11 ng umaga din nang ito ay puntahan sa landfill ng kanyang pamangkin, subalit hindi na ito makita sa lugar.
Bandang alas-6 ng hapon nang makita itong nakadapa, bahagyang natatabunan ang ulo at paa.
Ayon sa pamangkin ng biktima na si Manuel Carbo, nag-request na ito sa pulis na isailalim sa autopsy ang biktima dahil sa posibleng may naganap na foul play matapos na makita na nabalatan ang anit ng ulo ng biktima na umaabot sa apat hanggang limang pulgada ng haba.
Nagpapatuloy ang ginagawang imbestigasyon ng pulisya hingil sa nasabing insidente.
