DAKAL LANG sasabi at e makalingad
Kenu man, ing ngara nu’man karing labuad,
Ala nang tiktak ken king karinat mekad
Nun’e ing king anti kaniti miyanad.
Pablasang malagad lang bina ring alus
King bage yan ding e mekapal a dungus
Ginamal salapi at e maging marus
Kabang king telan dang puestu makatulus.
Nung nu’ imbes kesa pamagsilbing tapat
Ita’ning king balen arapan da’t sukat,
Ing nung makananu lang den mamatupat
Ding bulsa reti yang agad dang ilatlat.
At keta king e ra pipawasan deti
A para king balen, yang gawkan parati
Ding keraklan, inya itamu ing pilmi
At pane magdusa king dapat da reti.
Kasi potang itamu ing mangailangan
Para king bage a sukat dang sikasuan
Menasa itamu ing makakalinguan
King serbisyung dapat ibie ren nung misan.
Ugsyanan de man ing masa barya namu
Uli na ning alus nipnap da no’ rugu
Ding salaping dapat king serbisyung tutu
Mibie, (at e para ipamulsa ra mu).
At saka uling ning kareti menasa
E tune serbisyu ing karelang nasa,
Nun’e alang binit pamagsamantala,
Makanyan yan alang asensu ing bansa.
At ding memalen a sukat makinabang
Keng buwis ampon katutubung pilisunan,
Ila ring balamu magpalimus misan
Pasari ding lider a’yalang pikabsyan!
Pero nung e mu pin king uli ring dakal
A magkukunwaring atin lang masabal
(King balayan) inya makisamal-samal
At aplit la reting makitagal-tagal,
King bista’t ala lang balu agyang nanu
Ding keraklan karen keng pamangubyernu,
Ing balen maluat ne sanang progresibu
Imbes sobra bagal ing keyang asensu.
Sana pin, nung akua ta’ng makapilukluk
Karing tutung tau a sukat ta’ng ipuk
King tronung mapilan la pa ring milukluk
A e mikamansa ning nanu mang buluk,
Kanita marahil mibayu ne lupa
Ing sobra kamusing tamung pulitika,
Kapamilatan ding manginlag king baya
Ning tuksu’t aligwat ning kislap ding pera.
At keta king mayap a kararaptanan
Karin da itutuk ding e miulingan
King krus ding salapi itang karampatan
Mangibabo dapat king tamak a dalan,
A sukat baltangan papunta king ustu,
Mupin mililisya karing pulitiku,
A mapangupit at babawi rang ustu
Ing gastus da potang mipuk la king puestu?
At nu’ ding aliwa ken a bitasa mang
Alang unabis a perang makasimpan,
Intasang kaibat na mu ning pilan banuang
Pangalukluk deti milyunaryu no’ngan?!
At potang bilyones na la’t e mipagyu,
Karing bangku keti… king bangku nang Apo
Karin king Switzerland ipanilas rugu,
Ban keta e ta’la malaguang abalu?!
