1.
Misan atin bageng:
e na sucat abut ning kecatang isip
at nung surian tamu:
na cabayat dinan nanu mang matulid
king agya man sanang:
asacsiyan mu na ring e mu pilang besis
dapot king diwa mu:
ing pamicacunu gugusal yang pilit
2.
Anti namu nitang:
cacung caranasan king metung a baryu
nung nu mipasadsad:
itang liguran dang taung albularyu
cabalitan itang:
cagiwan na niti caniang pamanulu
inia daraywan de:
retang king marayung mecabalung tau’
3.
Neng manopira ya:
dacal a manalbeng mangapamulalâ
ustung gigilyan no:
balat ding pasyenti e la man darayâ
canita cu pamu:
menakit meculam pasari ning diryâ
aliwa la bosis:
mandalangat la ring mata ra’t magwalâ
4.
Ing e cu kelingwan:
caring pepaulung megi nang pasyenti
lalaki yang anac:
king panaun a’yta mimidad neng dosi
e no pa man ikit:
ding mi-indang dintang menabilin ne’yti’
“paluban yo” ngana:
“retang bayung datang a tatauling dili”
5.
At nganang sinabi:
king indu ning anac iniang miyarap la
“e pu caraniwan:
a sakit king kecang bungsu ing dinugpa”
maging detang atlung:
abe nang lalaking cayang cabarcada
nung e la mayagap:
misalunan la rin deting calupa na’ “
6.
Inia minutus yang:
idala ro caya ring atlu pang anac
“ngeni mu rin” ngana:
king ban deti canu e la mipahamac
dakitan yu na la:
cabang e pa tawli at atin pang oras
ban cu lang papuntan:
carin cabusantu’t papaniadwan tawad”
7
Carin cu abalu:
inia palang mismung aldo na ning daun
ding anac a reta:
penican de babo itang lumang pantiun
menakit lang busbus:
sildung de ing bungu’t pengalat a butul
saca ro penugse:
detang sampaga a carin macabuntun
8.
Agad nong tiburan:
nitang albularyu a reti munta la
carin cabusantu:
ban samasan itang anggang simbulat da
at king arap nitang:
pantiun na ning mete ing penabili’na
sindi lang kandila:
at maniawad tawad king depat dang sala
9.
Agpang king manulu;
cauli ra bale atlu la mu cabud
ding petawara’na:
ning lepastangan dang carin macacutcut
itang pasimunung:
king mata ning bungu aplit a tinandus
ya ing perusan na:
capamilata’na ning “cancer” king buntuc
10.
Pigmulalan cu ngan:
ing anggang sinabi na nitang manulu’
at mengapalyari:
king aldo ning daun carin cabusantu
e na naman ikit:
dapot mitutugma ing megi rang cuentu
a dimdam cu namang;
sinabi ring anac a carin ikit cu
11.
bucud pa canita:
ing parusang tinggap nitang pasimunû
ken mung pilang aldo:
ing cayang itsura migmistulang bungû
king caili nang mata:
maragul yang tigsa ing gulping tinubû
iniang opira’ne:
masangsang a bau ing dayang tinulû
12.
dininan neng taning;
nitang albularyu ing bie na ning anac
e na acabyusan:
itang caparusan king sala nang depat
“nanu mang gawan cung:
pakisabi kng ban munye yang patawad,
e ya bisa ngana;
ing lepastangan nang mete nang malambat”
13.
ngana ning manulu:
“mapalyaring itang mete silbahi ra”
king agya man ngeni:
atin yang cagiwan king ban mamarusa
magkukulam la mu:
ding ating upaya a gawa canita
o caya naman ding:
taung magdidiral iniang mabibie la
14.
Bigla cung minisip:
at angga man ngeni gunam-gunaman cu
ing milyaring ita:
a alang pakibat at waring misteryu
ining caranasang:
ecu acalinguan dinake kecayu
yampang ke para king:
paratang a daun, nobyembri a unu’
15.
Sinulat ke ining:
cacung cawatasan ban e na maulit
ke’nu pa mang anac:
lacuas na caretang masias balangidngid
manalangin tamu:
ban ding caladwa ra ganap nong taimic
ding mengamate nang
canitang milabas keti acasulit ……
